සටහන – පුලී
ඔක්තෝම්බර් 23, LNW (කොළඹ):මානව හිමිකම් ගැටලු සම්බන්ධයෙන් මතුව ඇති විවේචන හමුවේ, අප්‍රිකානු ග්‍රෑන්ඩ් ප්‍රී තරගයක් පැවැත්වීම පිළිබඳව නිහතමානීව සහ කරුණු අවබෝධ කරගනිමින් ප්‍රවේශ විය යුතු බව ලුවිස් හැමිල්ටන් පවසයි.
අප්‍රිකානු මහාද්වීපයේ ෆෝමියුලා වන් (Formula 1) තරගයක් පැවැත්වීම සඳහා රුවන්ඩාව තෝරා ගැනීම සම්බන්ධයෙන් මානව හිමිකම් පිළිබඳ ගැටලු මතු වී තිබේ.
මේ සම්බන්ධයෙන් අදහස් දක්වමින් බ්‍රිතාන්‍යයේ සුප්‍රකට F1 ධාවන ශූර ලුවිස් හැමිල්ටන් ප්‍රකාශ කර ඇත්තේ, ලොව පුරා විවිධ ගැටලු පවතින බැවින් මෙවැනි කරුණු සම්බන්ධයෙන් නිහතමානීව ප්‍රවේශ වීම වැදගත් බවයි.
ෆෝමියුලා වන් සංවිධානය රුවන්ඩාව සමඟ වසර 10ක ගිවිසුමකට එළඹ ඇති අතර, එම ගිවිසුම අනුව 2030 දශකයේ මුල් භාගයේ සිට එරට තුළ තරග පැවැත්වීමට සැලසුම් කර තිබේ.
වසර ගණනාවක් තිස්සේ අප්‍රිකානු මහාද්වීපයට F1 තරගයක් ගෙන ඒම වෙනුවෙන් පෙනී සිටි හැමිල්ටන් සඳහන් කළේ, ලොව විවිධ ප්‍රදේශවල පවතින ගැටලු පිළිබඳව තමන් දැනුවත් බවයි.
“අප තරග පැවැත්වීමට යන්නේ කොතැනද යන්න තීරණය කරන්නේ මා නොවෙයි. අද ලෝකය පුරාම විවිධ ගැටලු තිබෙනවා. ඒ සම්බන්ධයෙන් පළවන බොහෝ වාර්තා මම දැක තිබෙනවා. නමුත් අප මේ පිළිබඳව නිහතමානීව ප්‍රවේශ විය යුතුයි” යනුවෙන් ඔහු පවසා තිබේ.
තවද, අප්‍රිකානු ඉතිහාසය පිළිබඳව නිසි අවබෝධයක් ලබා ගැනීමේ වැදගත්කම ද හැමිල්ටන් අවධාරණය කළේය.
එංගලන්තයේ හැදී වැඩුණු තමන්ට පාසල් අධ්‍යාපනයේදී අප්‍රිකාව පිළිබඳව ප්‍රමාණවත් දැනුමක් ලබා නොදුන් බව සඳහන් කළ ඔහු, අප්‍රිකානු ඉතිහාසය පාසල් විෂය මාලාවට ඇතුළත් කළ යුතු බව ද ප්‍රකාශ කළේය.
අප්‍රිකානු රටවල් රැසක් අද මුහුණ දෙන ගැටලුවලට යටත්විජිතවාදයේ බලපෑම් සහ බටහිර රටවල මැදිහත්වීම් ද හේතු වී ඇති බව ඔහු වැඩිදුරටත් පෙන්වා දුන්නේය.
