රෂිකා හෙන්නායක ඔක්තෝබර් 24, කොළඹ LNW :
පොළොන්නරුවේ කලහගල ප්‍රදේශයේ නව අලි ඇතුන් රැකබලා ගැනීමේ මධ්‍යස්ථානයක් (Elephant Transit Home) පිහිටුවීමට තීරණය කර තිබේ.
වන සංරක්ෂණ දෙපාර්තමේන්තුවට අයත් හෙක්ටයාර 15ක පමණ භූමි ප්‍රමාණයක් මේ සඳහා වෙන් කරනු ලබන බව පොළොන්නරුව දිස්ත්‍රික් ලේකම් සුජාන්ත ඒකනායක මහතා පැවසීය.
මිනිසා සහ අලි ඇතුන් අතර ගැටුම්, ගංවතුර සහ දුම්රිය අනතුරු වැනි විවිධ ආපදා හේතුවෙන් තම මව්වරුන්ගෙන් වෙන් වූ හෝ තුවාල ලැබූ අලි පැටවුන්ගේ ජීවිත ආරක්ෂා කර ගැනීම මෙම වැඩසටහනේ අරමුණ බව දිස්ත්‍රික් ලේකම්වරයා සඳහන් කළේය.
පශු වෛද්‍යවරුන්, වන සංරක්ෂණ දෙපාර්තමේන්තුවේ නිලධාරීන් සහ මහජන නියෝජිතයින්ගෙන් සමන්විත විශේෂඥ කමිටුවක් විසින් සිදු කරන ලද සමීක්ෂණයකින් අනතුරුව, මෙම මධ්‍යස්ථානය පිහිටුවීම සඳහා කලහගල ප්‍රදේශය තෝරාගෙන ඇත.
වර්තමානයේ ශ්‍රී ලංකාවේ පවතින එකම අලි ඇතුන් රැකබලා ගැනීමේ මධ්‍යස්ථානය පිහිටා ඇත්තේ උඩවලවේ ප්‍රදේශයේය.
උතුරු සහ උතුරු මැද පළාත්වල සිට වන අලි පැටවුන් උඩවලවේ වෙත ප්‍රවාහනය කිරීමට පැය 7ත් 9ත් අතර කාලයක් ගත වන බව සුජාන්ත ඒකනායක මහතා පෙන්වා දුන්නේය.
තුවාල ලැබූ අලි පැටවුන් මෙතරම් දීර්ඝ කාලයක් ප්‍රවාහනය කිරීම ඔවුන්ගේ ජීවිතවලට දැඩි අවදානමක් ඇති කරයි.
මෙම මධ්‍යස්ථානය පිහිටුවීම මගින් පොළොන්නරුව දිස්ත්‍රික්කයේ සංචාරක කර්මාන්තය ප්‍රවර්ධනය කිරීමටත්, අලි පැටවුන්ට අවශ්‍ය ආහාර සැපයීම වැනි සේවාවන් හරහා ප්‍රදේශවාසීන්ට රැකියා අවස්ථා උදා කර දීමටත් හැකි වනු ඇතැයි දිස්ත්‍රික් ලේකම්වරයා වැඩිදුරටත් පැවසීය.
