මැතිවරණ කොමිෂන් සභාව තීරණය කර ඇත්තේ ඉදිරි පළාත් පාලන මැතිවරණය පැවැත්වීමට ඇති බාධා පවසමින් ශ්‍රේෂ්ඨාධිකරණය හමුවේ මෝසමක් ගොනු කිරීමටයි.
මැතිවරණ කොමිසමේ ප්‍රධානී නිමල් පුංචිහේවා පවසන්නේ, මුදල් නොමැතිකම, ප්‍රමාණවත් ඡන්ද පත්‍රිකා මුද්‍රණය කිරීමට රජයේ මුද්‍රණාලයට ඇති නොහැකියාව, ප්‍රවාහනයට ඉන්ධන ප්‍රමාණවත් නොවීම ආදිය මෙම ගැටලු නිර්මාණය වීමට බලපා ඇති බව ශ්‍රේෂ්ඨාධිකරණයට කොමිසම විසින් දැනුම් දෙන බවයි.
සැලසුම් කළ පරිදි පළාත් පාලන මැතිවරණය 2023 මාර්තු 09 වැනි දින පවත්වන බවට මැතිවරණ කොමිෂන් සභාව ශ්‍රේෂ්ඨාධිකරණය හමුවේ කළ ප්‍රතිඥාවට පටහැනිව මෙම ප්‍රකාශය කර ඇත. පුංචිහේවා මහතා පවසන පරිදි පළාත් පාලන මැතිවරණය පැවැත්වීම සඳහා අවශ්‍ය මුදල් නිකුත් කිරීම මහා භාණ්ඩාගාරය ප්‍රතික්ෂේප කර ඇත.
රජයේ මුද්‍රණාලයාධිපතිනී ගංගානි ලියනගේ මීට පෙර ප්‍රකාශ කළේ අවශ්‍ය පහසුකම් සපයා දෙන්නේ නම් දින පහක් ඇතුළත තැපැල් ඡන්ද පත්‍රිකා මුද්‍රණය කර බෙදා හැරීමට හැකිවනු ඇති බවයි. පළාත් පාලන මැතිවරණය සඳහා අවශ්‍ය ඡන්ද පත්‍රිකා සංඛ්‍යාව මිලියන 18 කට ආසන්න වන අතර ඉන් තැපැල් ඡන්ද සඳහා අවශ්‍ය වන්නේ 3% කි.
රෂිකා හෙන්නායක
