රට තුළ අලෙවිය සඳහා ඇති ඖෂධීය නිෂ්පාදනවල ආරක්ෂාව, ගුණාත්මකභාවය සහ කාර්යක්ෂමතාව පිළිබඳ අදාළ ප්‍රමිතීන් සපුරාලීම සහතික කරමින් මහජන සෞඛ්‍යය ආරක්ෂා කිරීම හා වැඩිදියුණු කිරීම ජාතික ඖෂධ නියාමන අධිකාරියේ (NMRA) කාර්යභාරය වන නමුත්, මේ වනවිට ජාතික ඖෂධ නියාමන අධිකාරියේ පාලකයින් විසින් ආයතනයේ සේවය කරනු ලැබූ අත්දැකීම් සහිත පුද්ගලයින් ආයතනයෙන් මුදා හරිමින් සිය අභිමතයන් පරිදි කටයුතු කරමින් සිටින බවට තොරතුරු වාර්තා වී ඇති බව විපක්ෂ නායක සජිත් ප්‍රේමදාස මහතා පවසයි.
ප්‍රශස්ථ ඖෂධ නියාමන ක්‍රියාවලියක් නොමැති වීම නිසා තත්ත්වයෙන් බාල ඖෂධ මෙරටට ආනයනය කර ඇති බවට තොරතුරු ද පසුගිය කාලයේ වාර්තා විය.
විශේෂයෙන්ම මෙම ක්‍රියාවන්ගේ ප්‍රතිඵලයක් වශයෙන් පසුගිය දිනවල අහිතකර ඖෂධ ප්‍රතික්‍රියා (Adverse Reaction) ඇති වී ඇතැම් පුද්ගලයින්ට සිය ජීවිත පවා අහිමි වුණු අවස්ථා ද වාර්තා වී ඇති බැවින් මේ සම්බන්ධයෙන් රජය වැඩි අවධානයක් යොමු කරමින් ජනතාවගේ සෞඛ්‍ය සමඟ අධිකාරියේ පාලකයින් විසින් සිදු කරනු ලබන මෙවැනි ක්‍රියා පාලනය කිරීමට රජය කඩිනමින් කටයුතු කළ යුතුව ඇති බවයි විපක්ෂ නායකවරයා අවධාරණය කළේ.
මේ පිලිබදව අවධානය යොමුකොට ස්ථාවර නියෝග අංක 27/2 යටතේ විපක්ෂ නායක සජිත් ප්‍රේමදාස මහතා ඊයේ (05) පාර්ලිමේන්තුවේදී ආණ්ඩුවෙන් ප්‍රශ්න රැසක් අසනු ලැබීය.
RN
