මේ වනවිට රටේ තත්වය යහපත් අතට හැරී ඇති බැවින් ශ්‍රී ලංකා පොදුජන පෙරමුණේ ජ්‍යේෂ්ඨයින්ට ඇමති ධුර ලබාදිය යුතුය යන්න එම පක්ෂයේ ස්ථාවරය බව රාජ්‍ය අමාත්‍ය ශාන්ත බණ්ඩාර මහතා පවසයි.
පසුගිය වසරේදී රටේ ඇතිවූ විශේෂිත දේශපාලන තත්වය අනුව එතෙක් අනුගමනය කළ ක්‍රමවලින් බැහැරව වෙනස් ක්‍රමවේදයකට අමාත්‍යවරුන් පත්කිරීම සිදුකෙරුණු බව පැවසූ ඒ මහතා අද වනවිට ඒ දේශපාලන තත්වයන් සාමාන්‍ය අතට හැරී ඇති බවයි සඳහන් කළේ.
එසේම පක්ෂයේ ජ්‍යේෂ්ඨයින් යනු පක්ෂය වෙනුවෙනුත් වත්මන් රජයට හිමි වූ ඡන්ද ලක්ෂ 69ක ජනවරම ලබාගැනීම වෙනුවෙනුත් මහත් කැපකිරීම් කළ දේශපාලනඥයින් බැවින් ඔවුන්ට සුදුසු තනතුරු ලැබිය යුතු බවත් ඒ මහතා ප්‍රකාශ කළේය.
ශාන්ත බණ්ඩාර මහතා මේ බව පැවසුවේ ඊයේ (05) ශ්‍රී ලංකා පොදුජන පෙරමුණු මූලස්ථානයේ පැවති මාධ්‍ය හමුවකට එක්වෙමිනි.
RN
