බීමතින් යතුරුපැදියක් ධාවනය කිරීම ඇතුළු වැරදි කිහිපයක් සම්බන්ධයෙන් ශ්‍රී ලංකා පොදුජන පෙරමුණේ හිටපු ප්‍රාදේශීය සභා මන්ත්‍රීවරයකුට ගම්පොළ මහේස්ත්‍රාත් අධිකරණය විසින් සිරදඬුවම් නියම කර තිබේ.
බීමතින් යතුරුපැදියක් ධාවනය කිරීමට අමතරව රක්ෂණ සහතිකයක්, ආදායම් බලපත්‍රයක් සහ රියදුරු බලපත්‍රයක් නොමැතිව යතුරුපැදිය ධාවනය සම්බන්ධයෙන් ද ඔහුට චෝදනා එල්ල වී ඇත.
එසේම 2018 වසරේ සිට විවිධ වැරදි කිහිපයක් සම්බන්ධයෙන් ඔහුට එරෙහිව පැවති නඩු විභාගවලදී වරින්වර අධිකරණය මඟහැර තිබීම හේතුවෙන් ඔහුට එරෙහිව මීට පෙර වරෙන්තුවක් ද නිකුත් කර ඇති බව සඳහන්.
පොලීසිය විසින් ඔහුව අත් අඩංගුවට ගෙන අධිකරණයට ඉදිරිපත් කිරීමෙන් අනතුරුව ගම්පොළ මහේස්ත්‍රාත් නාමල් පෙරේරා මහතා නියෝග කර තිබුණේ ඔහුට මාස දෙකක බරපතළ වැඩ සහිත සිරදඬුවමක් සහ රුපියල් 75,000ක දඩයක් පැනවීමටයි.
මෙම හිටපු මන්ත්‍රීවරයාට සිරදඬුවම් නියම වීමෙන් පසු ගම්පොළ ප්‍රදේශ කිහිපයක ජනතාව රතිඤ්ඤා දල්වා තිබුණු බවත් වාර්තා විය.
RN
