- ජනාධිපතිවරණය සහ මහ මැතිවරණය යන දෙකම 2024 වසරේ දී පවත්වන බව ජනාධිපති රනිල් වික්‍රමසිංහ පවසයි: ඒ අනුව, ජනාධිපතිවරණය, 2024 අගෝස්තු 15 වන දින (තව දින 296 කින්) කැඳවීමට සිදුවන බව මැතිවරණ විශ්ලේෂකයහු පෙන්වා දෙති.
- 2048 වන විට ශ්‍රී ලංකාව සංවර්ධිත ජාතියක් සහ “ස්මාර්ට් රටක්” බවට පත්කිරීම සඳහා ජනාධිපති රනිල් වික්‍රමසිංහ උපරිම කැපවීමෙන් සැලැස්මක් සකස් කර ඇති බව එක්සත් ජාතික පක්ෂයේ නියෝජ්‍ය නායක රුවන් විජේවර්ධන පවසයි: කෙසේවෙතත්, එවැනි සැලැස්මක් මෙතෙක් රටට ප්‍රසිද්ධියේ හෙළි කර නොමැති බව විචාරකයහු පවසති.
- එක්සත් රාජධානියේ ආන්දෝලනාත්මක රූපවාහිනී පුවත් නාලිකාවක් වන “චැනල් 4” (Channel 4) සිය මෑත දින විකාශනය සම්බන්ධයෙන් පාස්කු ඉරුදින ප්‍රහාරය පිළිබඳ ජනාධිපති විමර්ශන කොමිෂන් සභාව හමුවේ පෙනී සිටීම ප්‍රතික්ෂේප කරයි: සිය රහසිගත මූලාශ්‍ර, හෝ “රහසිගත මාධ්‍යවේදී තොරතුරු” අනාවරණය කළ නොහැකි බව පවසයි.
- මෙම වසරේ ශ්‍රී ලංකාවේ ආදායමේ 15% ක හිඟයක් දැනට නිරීක්ෂණය කළ හැකි අතර, එබැවින් ජාත්‍යන්තර මූල්‍ය අරමුදල ශ්‍රී ලංකාවෙන් “ශක්තිමත් අයවැයක් සහ පටු හිඟයක්” අපේක්ෂා කරන බව එම අරමුදලේ දූත ප්‍රධානී පීටර් බෘවර් පවසයි.
- දැනට පවතින මාසික ඉන්ධන මිල සංශෝධන වෙනුවට දෛනික ඉන්ධන මිල සංශෝධන ක්‍රමයක් 2024 පෙබරවාරි වන දින සිට හඳුන්වා දෙන බව විදුලිබල හා බලශක්ති අමාත්‍ය කංචන විජේසේකර පවසයි.
- සිය එක්සත් ජනපද සංචාරයට ප්‍රථම ජාතික ජන බලවේගයේ නායක අනුර කුමාර දිසානායක ශ්‍රී ලංකාවේ එක්සත් ජනපද තානාපතිනී ජුලී චන්ග් (Julie Chung) හමුවෙයි: පළාත් පාලන මැතිවරණය කල්දැමීම, පළාත් සභා මැතිවරණය නොපැවැත්වීම සහ “ජනාධිපතිවරණය කල් දැමීමට රජය විසින් සැලසුම් කර ඇති පියවර” පිළිබඳ කරුණු දක්වයි: ජාත්‍යන්තර මූල්‍ය අරමුදලේ මැදිහත්වීම හේතුවෙන් ජනතාවගේ ආර්ථික දුෂ්කරතා උත්සන්න වී ඇති බව ද අවධාරණය කරයි.
- “එක්සත් ජනපද කොංග්‍රසයේ කාරක සභා ක්‍රියාවලිය අධ්‍යයනය කිරීම සඳහා” ආංශික අධීක්ෂණ කමිටු සභාපතිවරුන් සහ සාමාජිකයන් කණ්ඩායමක් එක්සත් ජනපදයේ සංචාරයක නිරත වීමට නියමිත බව පාර්ලිමේන්තු මාධ්‍ය ඒකකය නිවේදනය කරයි: මෙම සංචාරයට ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනය (USAID) විසින් සම්පූර්ණ අරමුදල් දායකත්වය සපයන අතර, නැෂනල් ඩිමොක්‍රටික් ඉන්ස්ටිටියුට් (National Democratic Institute) විසින් “තාක්ෂණික සහාය” සපයයි: මෙම අධ්‍යයන වැඩසටහන “අදාළ කමිටුවල කාර්යයන් සඳහා වඩාත් ප්‍රජාතන්ත්‍රවාදී ප්‍රවේශයක් වර්ධනය කිරීම” අපේක්ෂා කරයි: මෙම “අධ්‍යයන චාරිකාවට” පාර්ලිමේන්තු මහලේකම් කාර්යාලයේ නිලධාරීන් ද සහභාගී වීමට නියමිත බව සඳහන්.
- සෙලින්කෝ කන්සොලිඩේටඩ් (Ceylinco Consolidated) සහ සෙලාන් බැංකුවේ හිටපු සභාපති ලලිත් කොතලාවෙල කොළඹ පෞද්ගලික රෝහලක ප්‍රතිකාර ලබමින් සිටියදී අභාවප්‍රාප්ත වෙයි: මිය යන විට ඔහු 85 වන වියේ පසුවිය.
- ඉන්දීය ප්‍රිමියර් ලීග් (IPL) හි ඉහළ පෙලේ කණ්ඩායමක් වන මුම්බායි ඉන්ඩියන්ස් (Mumbai Indians) ඉදිරි තරඟ වාරය සඳහා සිය නව පන්දු යැවීමේ පුහුණුකරු ලෙස ෂේන් බොන්ඩ් වෙනුවට, තම ශ්‍රේෂ්ඨතම පන්දු යවන්නා සහ බහු-කාලීන ශූර ලසිත් මාලිංග බඳවා ගනී.
- 2023 ICC ක්‍රිකට් ලෝක කුසලානයේ දී නෙදර්ලන්තය කඩුලු 5කින් පරාජය කරමින් ශ්‍රී ලංකා කණ්ඩායම සිය පළමු ජයග්‍රහණය හිමිකර ගනියි: නෙදර්ලන්තය සියලු දෙනා දැවී ලකුණු 262 (49.4); මධුසංක – 49/4: ශ්‍රී ලංකාව 263/5 (48.2), සධීර සමරවික්‍රම – 91*, චරිත් අසලංක – 44.
