සටහන – රෂිකා හෙන්නායක
ජනවාරි 05 කොළඹ (LNW): අද (05) දින කම්කරු හා විදේශ රැකියා අමාත්‍ය මනුෂ නානායක්කාර මහතාගේ ලේකම්වරයෙකු යැයි කියමින් ඊශ්‍රායලයේ රැකියා ලබාදීම සඳහා මුදල් අයකළ පුද්ගලයෙකු ශ්‍රි ලංකා විදේශ සේවා නියුක්ති කාර්යාංශයේ විශේෂ විමර්ශන ඒකකයේ නිළධාරීන් විසින් අත්අඩංගුවට ගෙන ඇති බව වාර්තා වේ.
එම පුද්ගලයා ඊශ්‍රායලයේ කෘෂිකාර්මික රැකියා ලබාදීම සඳහා ගාල්ල, බූස්ස හා වැලිගම යන ප්‍රදේශවල පදිංචි තරුණයින් දෙදෙනෙකුගෙන් රුපියල් ලක්ෂ 3 බැගින් මුදල් ලබාගෙන ඇති බව සඳහන් වේ.
අදාළ පුද්ගලයා පිළිබඳව සැක මතු වීම හේතුවෙන් ඒ සම්බන්ධයෙන් තරුණයින් කාර්යංශයට පැමිණිලි කර අතර, එහිදී ප්‍රකාශ සටහන් කරගැනීම සඳහා එම පුද්ගලයා කාර්යාංශය වෙත කැඳවූ අවස්ථාවේදී විමර්ශන නිළධාරීන් විසින් අත්අඩංගුවට ගෙන ඇති බව වාර්තා වේ.
ඒ අනුව අත්අඩංගුවට ගත් සැකකරු හෙට (06) දින මාතර මහේස්ත්‍රාත් අධිකරණය වෙත ඉදිරිපත් කිරීමට නියමිත බව වැඩි දුරටත් වාර්තා වේ.
ඊශ්‍රායලයේ කෘෂි රැකියා ලබාගැනීම සඳහා මෙම සැකකරුට මුදල් ලබාදී ඇති තැනැත්තන් වේ නම් 0112864241 යන අංකය ඔස්සේ කාර්යාංශයේ විශේෂ විමර්ශන අංශයට පැමිණිලි කරන මෙන් කාර්යාංශය මහජනතාවගෙන් ඉල්ලා සිටියි.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත👇👇
