1150 x 80 px
වැලිකඩ ඝාතනයේ මහ මොළකරු ජනාධිපති කරන්නද හදන්නේ !

2012 වසරේදී වැලිකඩ බන්ධනාගාරයේ රැඳවියන් 27 දෙනෙකු වෙඩි තබා ඝාතනය කිරීමේ සිද්ධියට අදාළව අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන බන්ධානාගාර ගත කර සිටින පොලිස් මත්ද්‍රව්‍යනාශක කාර්යාංශයේ පොලිස් පරීක්ෂක නියෝමාල් රංගජීව සහ බන්ධනාගාර කොමසාරිස් එමිල් රන්ජන් යන දෙදෙනා අද කොටුව මහේස්ත්‍රාත් අධිකරණයට ඉදිරිපත් කළ අවස්ථාවේ ඔවුන්ට විරෝධය පළ කරමින් බන්ධනාගාර රැඳවියන්ගේ අයිතිවාසිකම් සුරැකීමේ කමිටුව අධිකරණය ඉදිරිපිට විරෝධතාවක නිරත විය.

එම අවස්ථාවට එක්ව සිටි සත්‍යවේල් පියතුමා මාධ්‍ය වෙත අදහස් දක්වමින් කියා සිටියේ වැලිකඩ රැඳවියන් ඝාතනය පිළිබඳ සියළු කාරණා අනාවරණ වී තිබියදීත් එය සැලසුම් කර ඇති හිටපු ආරක්ෂක ලේකම් ගෝඨාභය රාජපක්ෂ මහතා මෙතෙක් අත්අඩංගුවට පත් නොවීම ප්‍රශ්නයක් බවයි. ප්‍රජාතන්ත්‍රවාදය ගරු කරන පිරිසක් ලෙස රජයෙන් තමන් ඇතුළු පිරිස ඉල්ලා සිටින්නේ හිටපු ආරක්ෂක ලේකම්වරයා වහාම අත්අඩංගුවට ගත යුතු බව යැයි ද හෙතෙම කියා සිටියේය. එමෙන්ම එම වාර්තාව මාධ්‍යයට අනාවරණ කළ යුතු බවද සත්‍යවේල් පියතුමා ප්‍රකාශ කළේය.

යහපාලනය පවතින බවට ජනතාවට ප්‍රත්‍යක්ෂ වන්නේ නීතියේ ආධිපත්‍ය ක්‍රියාත්මක වීම තුළ වන හෙයින් එය සුරක්ෂිත කිරීමට ජනාධිපතිවරයා හා අගමැතිවරයා මැදිහත් විය යුතු බවයි පියතුමා වැඩිදුරටත් අවධාරණය කළේ.

වැලිකඩ බන්ධනාගාරයේ රැඳවියන් ඝාතනය කිරීමේ සිද්ධියට සැකපිට රිමාන්ඩ් භාරයේ සිටින බන්ධනාගාර කොමසාරිස් එමිල් රංජන් සහ පොලිස් පරීක්ෂක නියෝමාල් රංගජීව මැයි 8 වැනි දා දක්වා යළි බන්ධනාගාරගත කරන ලෙස කොළඹ අතිරේක මහේස්ත්‍රාත් රංග දිසානායක මහතා අද (24) නියෝග කළේය.

- නිශාන්ත ප්‍රියදර්ශන

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය [email protected] වෙත යොමු කරන්න

Top