1150 x 80 px
අලූත් අවුරුද්දේ අලූත් දේශපාලන ගමනකට පෙළ ගැසෙමු!

2015 වසර නිමවී 2016 නව වසර උදාවී තිබේ. නව වසර උදාවී ඇත්තේ, මෙරට සියලූ ජනතාව වෙත අභියෝග රැසක්ද රැගෙනය. රට විශාල ආර්ථික අර්බුදයකට මුහුණ දී සිටී. අප සැම නව වසරට පා තබන්නේ වාර්තාගත රුපියල් බිලියන 740ක අයවැය පරතරයක් සහිතවය. ඊට මුහුණ දීමට නව ආර්ථික උපායමාර්ගයක්ද පාලක පංතිය සතුව නැත. එහි ප‍්‍රතිඵලය වන්නේ, මෙම අලූත් අවුරුද්දේ ආර්ථිකයේ බර ජනතාව මතට පැටවීමය. ජනතාවගේ සහන කැපී යාමය. එය කිසිසේත් සුබ වන්නේ නැත.

අනෙක් අතට රට සමාජ අර්බුදයකටද මුහුණ දී  සිටී. දිනෙන් දින අපරාධ වැඩිවේ. රිය අනතුරු වැඩිවේ. දිවිනසාගැනීම් වැඩිවේ. පරිසර විනාශය වැඩිවේ. ලෙඩ රෝග වැඩිවේ. වංචා-දූෂණ පෙර පරිදිමය. ඉන්පීඩාවට පත් වන්නේද පොදු ජනතාවමය.

සුපුරුදු ලෙස කරන සුබ පතා ගැනීම්වලින් පමණක් අලූත් අවුරුද්ද සුබ නොවනු ඇත්තේ මේ නිසාය. පසුගිය කාලයක් පුරා අලූත් අවුරුද්දේ පළමු දිනයේ එකිනෙකාට සුබ පතා ගත්තද පොදු ජනතාවට ඒ කිසිම අවුරුද්දක් සුබ වූයේ නැත.

මේ අනුව 2016 සැබෑ ලෙසම සුබ නව වසරක් කරගත යුතුය. ඒ සඳහා මෙරට ජනතාව මෙතෙක් ආ දේශපාලන ගමන් මඟ නව දිශාවකට හැරවිය යුතුය. සැබෑ ලෙසම ජනතාව දිනන දේශපාලන ගමන් මඟට එක් විය යුතුය. පැරණි දේශපාලන තීරණ වෙනස්කර නව වසරේ සිට නව දේශපාලන තීරණ ගැනීමට ධෛර්යය සම්පන්න විය යුතුය; දැනුවත් විය යුතුය. රට සැබෑ ජයග‍්‍රහණ කරා රැගෙන යන, පැරණි සමාජය වෙනුවට නව සමාජයක් ගොඩ නඟන දේශපාලන ගමනකට අවතීර්ණ විය යුතුය.  ඒ සඳහා දැවැන්ත ජනතා බලයක් ගොඩ නැගිය යුතුය.

අලූත් අවුරුද්ද සැබැවින්ම සුබ අලූත් අවුරුද්දක් වනු ඇත්තේ එසේ වූ විටය. ඒ වෙනුවෙන් ශ්‍රී ලංකාවාසී සියලූ දෙනාටම 2016 වසරේ සුබ අලූත් අවුරුද්දකට අපි සුබ පතන්නෙමු.

දේශපාලන මණ්ඩලය
ජනතා විමුක්ති පෙරමුණ
2016.01.01

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය editor@lankanewsweb.net වෙත යොමු කරන්න

Top