1150 x 80 px
ලංකා බැංකුවේ තනතුරු පිරවීමට මන්ත්‍රීලා අල්ලස් අරන්

ලංකා බැංකුව සඳහා බැංකු සහකාරවරුන් 1500ක් බඳවා ගැනීමට කටයුතු සම්පාදනය කරමින් පවතී. මෙම නව රැකියා අවස්ථා ප්‍රමාණය එක් අයකුට 50 බැගින් වශයෙන් එක්සත් ජාතික පක්ෂ මන්ත්‍රීවරුන් අතර බෙදා ගෙන ඇතැයි වාර්තා වේ. ඒ අනුව බැංකු සහකාර තනතුරු පිරවෙනු ඇත්තේ එජාප මන්ත්‍රීවරුන් විසින් ලබා දෙන නම් ලැයිස්තු අනුවය.

 

ලංකා බැංකුවේ පත්වීම් සඳහා සම්මුඛ පරීක්ෂණ පවත්වන්නේ ලංකා බැංකුවෙන් ම නමුත් මෙම පත්වීම් සඳහා සම්මුඛ පරීක්ෂණ කැඳවා ඇත්තේ එක්සත් ජාතික පක්ෂ මහලේකම්වරයා අමාත්‍ය තනතුර දරණ රාජ්‍ය ව්‍යවසාය සංවර්ධන අමාත්‍යාංශයෙනි.

මෙම රැකියා අවස්ථා ලබා දීම සඳහා අමාත්‍යාංශ නිලධාරීන් සහ මන්ත්‍රීවරුන්ගේ නිලධාරීන් එකතුව එක් අයදුම්කරුවකුගෙන් රුපියල් ලක්ෂ තුනත් පහත් අතර මුදලක් බැගින් අල්ලස් ලෙස ලබාගෙන ඇතැයි ද වාර්තා වේ. මේ සම්බන්ධ පැමිණිලි මේ වන විට ලංකා බැංකුවට දිගින් දිගට ම ලැබෙමින් පවතී.

මෙම පැමිණිලි සම්බන්ධයෙන් කටයුතු කිරීමට විධායක බලය ඇත්තේ බැංකුවේ සාමාන්‍යාධිකාරීවරයාට ය. ලංකා බැංකුවේ සාමාන්‍යධාරීවරයා ලෙස ඊයේ (22) වැඩ භාර ගත්තේ සෙනරත් බණ්ඩාර මහතාය. ඔහු එක්සත් ජාතික පක්ෂ පාර්ලිමේන්තු මන්ත්‍රී අශෝක අබේසිංහගේ ඥාතියෙකි. බණ්ඩාර මහතා හදිසියේම සාමාන්‍යාධිකාරී තනතුරට පත් කරවා ගත්තේම ඉහත කී පැමිණිලි යට ගැසීම සඳහා ම බව ද කියවේ. බණ්ඩාර මහතාට පෙර මෙම තනතුර සදහා ජ්‍යේෂ්ඨතම සහ නිර්දේශිත වී සිටියේ සුදත් ගුණසේකර මහතාය. ඔහු රාජපක්ෂ හිතවාදියෙකැයි පවසා කබීර් හෂීම් අමාත්‍යවරයා විසින් කපා හැර ඇත.

දැනට ලංකා බැංකුව තුළ කටයුතු කෙරෙමින් පවතින්නේ බැංකු සහකාර තනතුරු 1500ක් සඳහා අල්ලස් ලබාගත් බවට වන පැමිණිලි යට ගැසීම සඳහා ය.

ලංකා බැංකුව තුළ පසුගිය වකවානුවේ ඉහළ සිට පහළට බොහෝ දූෂණ සිදුව ඇති බව ලංකා නිව්ස් වෙබ් වෙත වාර්තා වී ඇත. අපි ඒවා එකින් එක හෙළිදරව් කිරීමට බලාපොරොත්තු වන්නෙමු.

ලංකා බැංකුවේ සභාපති තනතුර සඳහා ද අලුතින් පත් කිරීමක් ළඟදීම කිරීමට නියමිත බැව් ලංකා බැංකු අභ්‍යන්තර ආරංචි මාර්ග සඳහන් කරයි.

 

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය [email protected] වෙත යොමු කරන්න

Top