1150 x 80 px
ශ්‍රී ලංකා යුධ හමුදාව සහ ආරක්ෂක ලේකම් අධිකරණය නොමඟ යවලා

විශ්‍රාමික යුධ හමුදා මාණ්ඩලික ප්‍රධානී මේජර් ජනරාල් අමල් කරුණාසේකරට විදෙස් ගතවීම සඳහා අවසර ලබා ගැනීමට උත්සාහ කිරීමේදී ශ්‍රී ලංකා යුධ හමුදාව සහ ආරක්ෂක ලේකම් කපිල වෛද්‍යරත්න අධිකරණය නොමඟ යැවීමට උත්සාහ දරා ඇතැයි වාර්තා වේ.

මේජර් ජනරාල් අමල් කරුණාසේකර දැනට විදෙස් ගමන් තහනමකට ලක්ව සිටී. ඒ, 'ද නේශන්' පුවත්පතේ හිටපු කර්තෘ කීත් නොයාර් පැහැරගෙන ගොස් පහරදීම සහ 'සන්ඩේ ලීඩර්' පුවත්පතේ හිටපු කර්තෘ ලසන්ත වික්‍රමතුංග ඝාතනය සම්බන්ධ නඩුවලට අදාළවය.

පසුගිය බ්‍රහස්පතින්දා (29) මේජර් ජනරාල්වරයා මෝසමක් මාර්ගයෙන් අධිකරණයට කරුණු දක්වමින් ඉල්ලා තිබුණේ ඉන්දීය ආරක්ෂක ආරක්ෂක ඇකඩමියේ විශේෂ පුහුණු වැඩසටහනක ශ්‍රී ලංකාවේ සම්බන්ධීකරණ කටයුතු තමන්ට පැවරී ඇති බැවින් ඒ සදහා විදෙස් ගතවීමට අවසර ලබා දෙන ලෙසය. යුධ හමුදාව වෙනුවෙන් ඉහළ නිලධාරියෙක් මේ සම්බන්ධයෙන් අධිකරණයට කරුණු දක්වා තිබුණු අතර ඔහු තම කරුණු තහවුරු කිරීම සඳහා ආරක්ෂක ලේකම්වරයාගේ අත්සනින් යුත් ලිපියක් අධිකරණයට ඉදිරිපත් කර තිබිණි.

අපරාධ පරීක්ෂණ දෙපාර්තමේන්තු නිලධාරීන් මෙම ලිපිය පරීක්ෂා කිරීමේදී හෙළිවී තිබුණේ එම ලිපියට අත්සන් තබා තිබුණේ ආරක්ෂක ලේකම් කපිල වෛද්‍යරත්න නොව ඔහු වෙනුවට වෙනත් අයකු බවයි. එමෙන්ම අධිකරණයට ඉදිරිපත් කර තිබුණේ ලිපියේ මුල් පිටපත නොව ඡායා පිටපතකි.

අපරාධ පරීක්ෂණ දෙපාර්තමේන්තු නිලධාරීන් විසින් ඒබව අධිකරණයට දැනුම් දුන් මොහොතේ යුධ හමුදා නීති උපදේශකවරයා ප්‍රකාශ කර තිබුණේ ආරක්ෂක ලේකම්වරයා විදෙස්ගතව සිටින නිසා ඔහු වෙනුවට වෙනත් නිලධාරියෙකු අත්සන් තබා ඇති බවත් ලිපියේ මුල් පිටපත පසුව අධිකරණයට ඉදිරිපත් කළ හැකි බවත්ය.

එහිදී අපරාධ පරීක්ෂණ දෙපාර්තමේන්තු නිලධාරීන් මේජර් ජනරාල් අමල් කරුණාසේකරට විදෙස් ගතවීමට අවසරදීමට විරෝධය පළ කරමින් ප්‍රකාශ කර තිබුණේ පහරදීම් සහ ඝාතන සිද්ධි කිහිපයක් සම්බන්ධයෙන් මේජර් ජනරාල්වරයාගෙන් ප්‍රශ්න කිරීමට ඇති බවත් ඔහුට විදෙස්ගත වීමට අවසර ලබා දුනහොත් ඔහු ආපසු නොපැමිණීමට ඉඩ ඇති බවත්ය.

කෙසේවෙතත් ඉදිරිපත් කර තිබූ ලේඛන මත පදනම් වෙමින් මහේස්ත්‍රාත්වරයා ඒ මොහොතේ මේජර් ජනරාල් අමල් කරුණාසේකරට විදෙස්ගතවීම සඳහා අවසර ලබා දුන්නේ පෙරකී ලිපියෙහි මුල් පිටපත සඳුදා දින අධිකරණයට ඉදිරිපත් කරන ලෙස නියෝග කරමිනි.

කණ්ඩලම වෙනත් රටක්ද ?

මේ සම්බන්ධයෙන් දිගින් දිගටම කරුණු විමර්ශනය කළ අපරාධ පරීක්ෂණ දෙපාර්තමේන්තු නිලධාරීන්ට හෙළිදරව් වී ඇත්තේ ආරක්ෂක ලේකම් කපිල වෛද්‍යරත්න මහතා විදෙස්ගත වී නොමැති බවත් ඔහු එදින කණ්ඩලම ප්‍රදෙශයේ සිට ඇති බවත්ය. ඒ අනුව යුධ හමුදා නිලධාරීන් අධිකරණය නොමඟ යැවීමට කටයුතු කර ඇති බව පැහැදිලිය.

මේ සම්බන්ධයෙන් අපරාධ පරීක්ෂණ දෙපාර්තමේන්තු නිලධාරීන් අධිකරණය ඉදිරියේ දැඩි විරෝධය පළ කර ඇති අතර මහේස්ත්‍රාත්වරයා විසින් අද ඒ පිළිබඳව විමර්ශනයක් සිදු කරමින් පවතී. ඒ පිළිබඳ වැඩි විස්තර ඔබ වෙත ගෙන ඒමට ලංකා නිව්ස් වෙබ් අප සූදානම්ය.

අපරාධ පරීක්ෂණ දෙපාර්තමේන්තු නිලධාරීන් ඉහත කරුණු විමසීම සඳහා ආරක්ෂක ලේකම්වරයා මුණගැසීමට කිහිප වාරයක්ම තැත්කර ඇතත් ඔහු එය මඟහැර ඇත. ඉන් පැහැදිලි වන්නේ මේජර් ජනරාල් අමල් කරුණාසේකරට රටින් පළායාමට ආරක්ෂක ලේකම්වරයාත් වංචනික ලෙස සහයෝගය දෙන බවය.

මේජර් ජනරාල් අමල් කරුණාසේකර අවංක නිලධාරියෙකු බව අපිත් පිළිගනිමු. මන්දයත් ඔහු එරිත්‍රියාවේ සේවය කරන සමයේ හිටපු ආරක්ෂක ලේකම් ගෝටාබය රාජපක්ෂ විසින් ඔහුව ශ්‍රී ලංකාවට ගෙන්වා ගෙන තිබුණේ ලසන්ත වික්‍රමතුංග ඝාතනය ඇතුළු මාධ්‍යවේදීන්ට එරෙහිව එල්ල වූ ප්‍රහාර සඳහා එවකට හමුදාපති සරත් ෆොන්සේකා සම්බන්ධ බවට ප්‍රකාශයක් ඔහු ලවා ලබා ගැනීමටය. එහෙත් ඔහු එවන් ප්‍රකාශයක් කිසිදා ලබා දුන්නේ නැත.

මේ මොහොතේ මේජර් ජනරාල්වරයා විසින් කළ යුතුව ඇත්තේ ඉහත කී පහරදීම් සහ ඝාතන සම්බන්ධයෙන් තමන් දන්නා ඇත්ත රහස් පොලිසියට හෝ අධිකරණයට ප්‍රකාශ කිරීම පමණකි.

Additional Info

මෙම පුවත පිළිබඳව යම් පාර්ශවයකට අගතියක් සිදුවූයේ නම් ඒ සම්බන්ධයෙන්  ප්‍රතිචාර දැක්වීමට ඔබට අයිතියක් ඇති බව අප පිළිගනිමු. ඒ අනුව ඔබගේ ප්‍රතිචාරය editor@lankanewsweb.net වෙත යොමු කරන්න

Top