කොළඹ LNW:හිටපු ජනාධිපති රනිල් වික්‍රමසිංහ මහතාව අල්ලස් හෝ දුෂණ චෝදනා විමර්ශන කොමිසම හමුවේ කැඳවීමට පියවර ගැනීම සම්බන්ධව එම කොමිසමේ ක්‍රියාපිළිවෙල කෙරෙහි අවධානය යොමුකරමින් ඔහු අද(11) විශේෂ නිවේදනයක් නිකුත් කර තිබේ.
හිටපු ජනාධිපතිවරයාව කැඳවීමට දින ලබා දී ඇත්තේ සිංහල හින්දු අලුත් අවුරුදු සමය තුළ බවත් මෙම කාලසීමාවේදී ඔහුත් ඔහුගේ නීතීඥයින් කොළඹ රැඳි නොසිටින බැවින් වෙනත් දිනයක් ඉල්ලීමට පියවර ගෙන ඇති බවයි එම නිවේදනයේ දැක්වෙන්නේ.
තවද නිවේදනය නිකුත් කරමින් වික්‍රමසිංහ මහතා පෙන්වා දෙන්නේ අල්ලස් කොමිසමේ වේගය ලෝක වාර්තාවක් තැබිමට සමාන බවත් මිට පෙර මෙවනි ආකාරයට කටයුතු කර නොමැති බවත්ය
පාර්ලිමේන්තු මන්ත්‍රී චාමර සම්පත් දසනායකට එරෙහිව පවරා ඇති අල්ලස් නඩුව සම්බන්ධයෙන් ප්‍රකාශයක් ලබාදීමට තමා අල්ලස් හෝ දුෂණ චෝදනා විමර්ශන කොමිසම හමුවේ පෙනී සිටීමට සුදානම් බව හිටපු ජනාධිපති රනිල් වික්‍රමසිංහ මහතා ඊයේ පවසා තිබුණු අතර ඊට ඉතා වේගයෙන් අල්ලස් හෝ දුෂණ චෝදනා විමර්ශන කොමිසම මඟින් ප්‍රතිචාර දක්වා තිබුණේ අදාළ ප්‍රකාශය ලබාගැනීම සඳහා එළඹෙන 17 වැනිදා අල්ලස් කොමිසමට පැමිණෙන ලෙසයි.
අල්ලස් කොමිසමේ නිළධාරීන්ගේ රාජකාරී නොකරන රාත්‍රි කාලය අඩු කල විට පැය තුනක පමණ කාලයක් ඇතුලත ලිපි ගොණු සකසා අධ්‍යක්ෂක වෙත යොමු කර මේ සඳහා කොමිසන් සභාවද රැස් කර තිබෙන බව වික්‍රමසිංහ මහතා සිය නිවේදනයෙන් පෙන්වා දී ඇත.
ආශිකා බ්‍රාහ්මණ
