Tag: පාර්ලිමේන්තුව

කොළඹ LNW: හිටපු කථානායක, නියෝජ්‍ය කථානායක සහ නියෝජ්‍ය කාරක සභාසපතිගේ ඉන්ධන වියදම් සහ වත්මන් පාර්ලිමේන්තුවේ එම තනතුරු විසින් පසුගිය පෙබරවාරි 25 වැනිදා දක්වා කරන ලද ඉන්ධන වියදම් සම්බන්ධයෙන් වාර්තාවක් අද (12) පාර්ලිමේන්තුවේදී සභානායක අමාත්‍ය බිමල් රත්නායක මහතා විසින් සභාගත කළේය.

වත්මන් ආණ්ඩුව වාර්තා ඉදිරිපත් කිරීමෙන් පමණක් නොව ක්‍රියාවෙන්ද ආදර්ශය සපයා ඇති බවයි අමාත්‍යවරයා සඳහන් කළේ.

”හිටපු කථානායක ගරු මහින්ද යාපා අබේවර්ධන මහතා 2023 ජනවාරි සිට දෙසැම්බර් 31 දක්වා වාහන 08ක් භාවිතා කොට තිබෙනවා. ඒ සඳහා මිලියන 26ක ඉන්ධන භාවිතා කර තිබෙනවා. එය පාර්ලිමේන්තුවේ මූල්‍ය අධ්‍යක්ෂකතුමා සහතික කොට තිබෙනවා. මම එය හැන්සාඩ් කරනවා. ඒ වගේම 2023 සම්පූර්ණ වර්ෂයේම නියෝජ්‍ය කථානායකතුමා එතුමා වාහන 06ක් භාවිතා කර තිබෙනවා. මිලියන 14ක ඉන්ධන වියදමක් දරා තිබෙනවා. ඊට පස්සේ නව වෙනි පාර්ලිමේන්තුවේ නියෝජ්‍ය කාරක සභා සභාපති ඔහු වාහන 04කුත් මිලියන 7.8ක ඉන්ධන භාවිතා කර තිබෙනවා. 2024 වසරේදී හිටපු කථානායකතුමා වාහන 09ක් සහ මිලියන 33ක ඉන්ධන භාවිතා කර තිබෙනවා. 2024 වත්මන් ආණ්ඩුව බලයට එනකම් හිටපු නියෝජ්‍ය කථානායකතුමා මිලියන 13ක ඉන්ධන භාවිතා කර තිබෙනවා. වාහන 06ක් භාවිතා කර තිබෙනවා. 2024 පළමු මාස 09ට හිටපු නියෝජ්‍ය කාරක සභා සභාපතිතුමා වාහන 04ක් සමඟ මිලියන 7.2ක ඉන්ධන භාවිතා කර තිබෙනවා. මේ සියලු වියදම පාර්ලිමේන්තුවේ මුදල් අධ්‍යක්ෂතුමා විසින් සනාථ කොට තිබෙනවා.”

මේ අතර වර්තමාන පාර්ලිමේන්තුවේ වෙනසත් බිමල් රත්නායක මහතා විසින් ප්‍රකාශ කරන ලදී.

”2024 වර්ෂයේ පළමු මාස එකහමාරට නව කථානායකතුමා විසින් භාවිතා කරන ලද ඉන්ධන වියදම එක්ලක්ෂ විසිතුන්දාහයි. නියෝජ්‍ය කථානායකතුමාගේ ඉන්ධන වියදම එම කාලයට රු.45,000යි. නියෝජ්‍ය කාරක සභා සභාපතිනියගේ ඉන්ධන වියදම රු.18,000යි. 2025 ජනවාරි මාසයේ කථානායකතුමාගේ ඉන්ධන වියදම දෙලක්ෂ දහඅටදාහයි. නියෝජ්‍ය කථානායකතුමාගේ විසිතුන්දාහයි. කාරක සභා සභාපතිතුමියගේ ඉන්ධන වියදම 81,000යි. පෙබරවාරි 25 දක්වා කථානායකතුමනි ඔබතුමාගේ ඉන්ධන වියදම 1,23,000යි. නියෝජ්‍ය කථානායකතුමාගේ රු.25000යි. මේ සියල්ල මම හැන්සාඩ් කරනවා. වාර්තා ඉදිරිපත් කිරීමෙන් පමණක් නෙවෙයි අප ආදර්ශයෙනුත් ලබා දී තිබෙන දේ අගය කරනවා. ඒ ඉල්ලා සිටිනවා ඔබතුමාගෙන් ඔබතුමාගේ අභිමතය පරිදි විගණන තීරණ මත අවශ්‍ය කරන නීතිමය ක්‍රියාමාර්ග ගන්න පුළුවන් නම් ඒ පිළිබඳවත් කල්පනා කර බලන්න.” යනුවෙන් බිමල් රත්නායක මහතා ප්‍රකාශ කළේය.

ආශිකා බ්‍රාහ්මණ

කොළඹ LNW:මන්ත්‍රී වරප්‍රසාද අවභාවිතා කරමින් පාර්ලිමේන්තුව තුළ අසත්‍ය ප්‍රකාශ සිදුකිරීම වළක්වාලීම සඳහා ආණ්ඩුව කටයුතු නොකරන්නේ නම් එය නතර කිරීම සඳහා තමන් පෞද්ගලික මන්ත්‍රි යෝජනාවක් ගෙන එන බව පාර්ලිමේන්තු මන්ත්‍රී නාමල් රාජපක්ෂ මහතා පවසයි.

එම යෝජනාව සඳහා අසත්‍ය ප්‍රකාශ සිදුකරනවාට අකමැති සියලුදෙනා ඡන්දය භාවිතා කරනු ඇති බවයි මන්ත්‍රීවරයා කියාසිටින්නේ.

පාර්ලිමේන්තුවතුළ අසීමිත ලෙස බොරු කියන බවත් මන්ත්‍රී වරප්‍රසාද යටතේ එය සිදුකරන බවත් ඔහු කියාසිටියි.

”ඒක දීලා තියෙන්නේ ජනතා ප්‍රශ්න ඇති සැටියෙන් කියන්න මිසක් බොරු කියන්න නෙමෙයි. එය වෙනස් විය යුතුයි. ඒක අවභාවිත කරනවා නම්, ඒ සඳහා ආණ්ඩුව ක්‍රියාත්මක වෙන්නේ නැත්නම් පෞද්ගලික මන්ත්‍රී යෝජනාවක් හරි ගෙනල්ලා ඒක වෙනස් කරන්න කටයුතු කරනවා. අපි බලමු පාර්ලිමේන්තුවේ බොරු කියනවාට 225න් කී දෙනෙක් විරුද්ධ ද කියලා. අපි ඇත්ත කතා කරනවා නම් අපිට ඒ අයිතිය ඕනේ නෑනේ. මට ඕනේ නෑ. මම පාර්ලිමේන්තුවේ දීවත් එළියේවත් මම නොකරපු දෙයක් කියන්නෙත් නෑ, කරන්න බැරි දෙයක් කියන්නෙත් නෑ සහ තව කෙනෙක්ගේ චරිතය මම ඝාතනය කරන්නෙත් නෑ. ජනතාව මුලා කරන අය මේකට විරුද්ධ වෙයි.” යනුවෙන් රාජපක්ෂ මහතා ප්‍රකාශ කරයි.

ආශිකා බ්‍රාහ්මණ

කොළඹ LNW:2024 ජනවා 01 සිට සිට සැප්තැම්බර් මස 24 දක්වා කාලය තුළ හිටපු කථානායකවරයා වාහන 09ක් භාවිතා කර ඇති අතර ඒ සඳහා ඉන්ධන පිරිවැය පමණක් රු. ලක්ෂ 334ක් බව අද (27) පාර්ලිමේන්තුවේදී අමාත්‍ය බිමල් රත්නායක මහතා අනාවරණය කර සිටියේය.

ඒ අනුව මාසයකට රු. ලක්ෂ 40කට අසන්න මුදලක් හිටපු කථානායක ඉන්ධන සඳහා භාවිතා කර ඇති බවයි අමාත්‍යවරයා සඳහන් කළේ.

හිටපු නියෝජ්‍ය කථානායකවරයා වාහන 06ක් භාවිතා කර ඇති අතර ඔහු වෙනුවෙන් එම මාස 09 තුළ ලක්ෂ 135ක ඉන්ධන පිරිවැයක් දරා ඇති බවද අද අනාවරණය විය.

හිටපු කථානායකවරයාට මසකට රු. ලක්ෂ 40කට අසන්න ඉන්ධන බිලක් වෙන වුවද වර්තමාන කථානායකවරයාගේ මසක ඉන්ධන බිල දෙලක්ෂ දහඅටදාහක් බවද බිමල් රත්නායක මහතා සඳහන් කරන ලදී.

එනෙම වර්තමාන නියෝජය කථානායකවරයාගේ මසක ඉන්ධන පිරිවැය ලෙස වාර්තා වී ඇත්තේ රු. 23000ක් වන අතර නියෝජ්‍ය කාරක සභා සභාපතිනියට මසකට වැයවී ඇති ඉන්ධන වියදම රු. 81,000ක් ලෙස දැක්වෙන අතරම හිටපු පිරිස් ඉන්ධන පිරවුම්හල් පවත්වාගෙන ගොස් ඇත්ද යන්න සොයා බැලීමට සිදුවන බවයි අමාත්‍යවරයා කියාසිටියේ.

මේ අතර 2023 වසරේ කථානායක නිල නිවසේ කෑම වියදම සඳහා රු.ලක්ෂ 26ක පිරිවැයක් රජය දරා ඇති අතර 2024 දී එය ලක්ෂ 32ක් ලෙස වාර්තා වී තිබෙන බවද බිමල් රත්නයක මහතා අනාවරණය කළේය.

එමනක් නොව හිටපු කතානායක,නියෝජ්‍ය කථානායක වැනි අය පාර්ලිමේන්තුවට අයත් ආහාර අමුද්‍රව්‍ය පවා ඉතාම නින්දිත ලෙස බිල් යොදා නිවෙස් වෙත රැගෙන ගොස් තිබෙන බවද අමාත්‍යවරයා ප්‍රකාශ කරන ලදී.

ආශිකා බ්‍රාහ්මණ

කොළඹ LNW:අධිකරණ අමාත්‍ය හර්ෂණ නානායක්කාර මහතාගේ නම ඉදිරියේ ආචාර්ය පදවියක් සඳහන් කිරීම සම්බන්ධයෙන් අමාත්‍යවරයා විසින් අපරාධ පරීක්ෂණ දෙපාර්තමේන්තුවට කරන ලද පැමිණිල්ලට අදාළව ඒ සම්බන්ධයෙන් ප්‍රකාශයක් ලබාගැනීම සඳහා පාර්ලිමේන්තු කාර්ය මණ්ඩල නිලධාරීන් කිහිපදෙනෙකු හෙට (15) අපරාධ පරීක්ෂණ දෙපාර්තමේන්තුවට කැඳවා තිබේ.

පාර්ලිමේන්තුවේ සභා ලේඛන කාර්යාලයේ උසස් නිලධාරියෙකු ඇතුළු කිහිපදෙනෙකු එලෙස කැඳවා තිබෙන බව සඳහන්.

මෙම සිද්ධියට අදාළව පාර්ලිමේන්තුවේ සන්නිවේදන අංශයේ අධ්‍යක්ෂවරයා ඇතුළු කිහිප දෙනෙකු ද ප්‍රකාශයක් ලබා ගැනීම සඳහා අපරාධ පරීක්ෂණ දෙපාර්තමේන්තුව හමුවට කැඳවා තිබුණි.

අපරාධ පරීක්ෂණ දෙපාර්තමේන්තුවේ නිලධාරීන්ද පාර්ලිමේන්තුවට පැමිණ එහි නිලධාරීන්ගෙන් ප්‍රකාශ සටහන් කර ගැනීම ද සිදු කර ඇත..

අමාත්‍යවරයාගේ නම ඉදිරියෙන් ආචාර්ය පදවිය යොදා ඇත්තේ සභා නායක කාර්යාලයෙන් ලද තොරතුරු අනුව බවද සඳහන්.

ආශිකා බ්‍රාහ්මණ