ඕවින්දි විෂ්මිකා
ජනවාරි 02, කොළඹ (LNW): ශ්රී ලංකාවේ 6 ශ්රේණියේ ඉංග්රීසි භාෂා පෙළපොතක සරල අධ්යාපනික දෝෂයක් සම්බන්ධයෙන් ඇති වූ මතභේදයක් තත්ත්වය ඉක්මවා යමින් රටපුරා සංස්කෘතික, දේශපාලනික සහ සමාජීය වශයෙන් ගැඹුරු මතභේද හෙළි කරන ජාතික කතාබහක් බවට පත්ව ඇත.
ඒ, අවුරුදු 11 සහ 12 අතර වයස් කාණ්ඩයට අදාළ පාසල් පෙළපොතක සඳහන් වෙබ් සබැඳියකට පිවිසෙන විට සමලිංගික වැඩිහිටි ප්රේක්ෂකයන්ට අදාළ අන්තර්ගතයකට පරිශීලකයන් යොමු කිරීම සම්බන්ධයෙනුයි. මෙම කරුණ හෙළිවීමත් සමඟ දෙමාපියන් සහ ආගමික නායකයන්ගෙන් පමණක් නොව දේශපාලන පාර්ශ්වයන්ගෙන් ද දැඩි විරෝධයක් මතු විය.
මෙයට ප්රතිචාර වශයෙන් ශ්රී ලංකා විදුලි සංදේශ නියාමන කොමිෂන් සභාව (TRCSL) එම වෙබ් අඩවියට ප්රවේශ වීම අවහිර කිරීමට ඉක්මනින් පියවර ගත් අතර අධ්යාපන අමාත්යාංශය අදාළ මොඩියුලය බෙදාහැරීම තාවකාලිකව අත්හිටුවා අභ්යන්තර පරීක්ෂණයක් ආරම්භ කළේය. එසේම එම සබැඳිය පෙළපොතට ඇතුළත් වූයේ කෙසේද යන්න සොයා බැලීම සහ එයට වගකිව යුතු පාර්ශ්වයන් හඳුනා ගැනීම අපරාධ විමර්ශන දෙපාර්තමේන්තුවට (CID) පැවරී ඇත.
තාක්ෂණික දෝෂයකින් ඔබ්බට
අධිකාරීන් මෙම සිදුවීම බරපතල අතපසුවීමක් ලෙස විස්තර කළ ද ජනතා ප්රතිචාරයෙන් පෙනී යන්නේ මෙය තාක්ෂණික වැරැද්දකට වඩා එහා ගිය ගැඹුරු සමාජීය ගැටලුවක් බවයි. විශේෂයෙන්ම පාසල් අධ්යාපනය තුළ ලිංගික දිශානතිය, සමාජභාවී අනන්යතාව සහ විවිධත්වය යනා දී සංවේදී කරුණු ගතානුගතික සහ ආගමික සමාජයක් තුළ කෙසේ සාකච්ඡා කළ යුතුද යන්න පිළිබඳ පුළුල් සංවාදයක් ඇති කර තිබේ.
විචාරකයන් පෙන්වා දෙන්නේ හොඳ අරමුණකින් සමානාත්මතාවය හෝ වෙනයම් දෙයක් හෝ වේවා ප්රවර්ධනය කිරීමට ගන්නා උත්සාහයන් පවා නිසි ලෙස ක්රියාත්මක නොවීම හේතුවෙන් අසාර්ථක විය හැකි බවයි. වැඩිහිටි අන්තර්ගතයකට යොමු වන සබැඳියක් ළමුන් සඳහා වූ පෙළපොතකට ඇතුළත් වී තිබීම බොහෝ දෙනාගේ අදහසට අනුව පිළිගත නොහැකි කරුණකි.
බොහෝ දෙමව්පියන් පවසන්නේ මෙහි ගැටළුව ඇත්තේ LGBTQIA+ අයිතිවාසිකම් ගැන නොව නුසුදුසු අන්තර්ගතයන් වලින් දරුවන් ආරක්ෂා කිරීම ගැන බවයි.
අධ්යාපන විශේෂඥයන් අනතුරු අඟවා ඇත්තේ මෙවැනි සිදුවීම් තුළින් මහජන විරෝධය තවදුරටත් උත්සන්න කරමින් LGBTQIA+ අයිතිවාසිකම් ප්රවර්ධනය පිළිබඳ වැරදි අවබෝධයන් ශක්තිමත් කිරීමට ඉඩ සලසන බවයි.
“නිවැරදි” ලිංගිකත්වය සහ සබඳතා අධ්යාපනය කෙසේ විය යුතු ද?
තරුණ වියේ ඉගෙනුම ලබන්නන් සඳහා සුදුසු ලිංගිකත්වය සහ සබඳතා අධ්යාපනය යනු කුමක්ද යන්න පිළිබඳ විවාදය ද මෙම මතභේදය තුළින් නැවත කරළියට පැමිණ ඇත. අධ්යාපන විශේෂඥයන් පවසන්නේ ළමුන් සඳහා ලිංගික හා සම්බන්ධතා අධ්යාපනය වයසට ගැලපෙන, විද්යාත්මක සහ සංස්කෘතික සංවේදී ආකාරයකින් ලබා දිය යුතු බවයි. එය පැහැදිලි විෂය කරුණු හෝ අසම්මත අන්තර්ගතයට වඩා ගෞරවය, කැමැත්ත (consent), සංවේදීභාවය සහ විවිධත්වය පිළිගැනීම වැනි මූලික අංග මත කේන්ද්රගත විය යුතුය.
ලෝකයේ බොහෝ රටවල මෙවැනි කරුණු ක්රමිකව හඳුන්වා දෙන අතර ගුරු පුහුණුව සහ දෙමාපියන්ගේ සහභාගීත්වය ද අත්යවශ්ය කොටසක් ලෙස ඊට ඇතුළත් වේ. විවේචකයන් පෙන්වා දෙන්නේ ශ්රී ලංකාවේ අඛණ්ඩ විෂයමාලා ප්රතිසංස්කරණවල දී මෙවැනි ආරක්ෂක පියවර ප්රමාණවත් ලෙස ක්රියාත්මක නොවූ බවයි.
විනිවිදභාවය සහ මහජන විශ්වාසය
මෙම සිද්ධියට නිසා ඇති වූ දැඩි ජනතා ප්රතිචාරය තුළින් වෙස්ටර්න් සංස්කෘතික බලපෑම්, වේගවත් සමාජ වෙනස්කම් සහ අධ්යාපන ප්රතිසංස්කරණවල පැහැදිලිභාවය නොමැතිවීම වැනි සමාජයේ පවතින පුළුල් භීතිකා ප්රකාශයට පත් කරයි.
මොඩියුලය නවතා විමර්ශන ආරම්භ කිරීමට අමාත්යාංශය ගත් තීරණය සමහරුන් විසින් පිළිගෙන ඇති අතර තවත් සමහරු තර්ක කරන්නේ මහජන විශ්වාසය නැවත ගොඩනැගීම සඳහා විවෘත සංවාද, මහජන සාකච්ඡා සහ පරීක්ෂණ ප්රතිඵල ප්රසිද්ධ කිරීම අත්යවශ්ය බවයි.
දේශපාලනය හා සමාජීය පසුබිම
සිද්ධිය සංකීර්ණ සමාජ-දේශපාලනික පසුබිමකට එරෙහිව දිග හැර තිබේ. ශ්රී ලංකාවේ ගතානුගතික සංස්කෘතික සම්මතයන්, ශක්තිමත් ආගමික ආයතන සහ සමරිසි සබඳතා අඛණ්ඩව අපරාධකරණය කිරීම LGBTQIA+ ගැටළු කෙරෙහි මහජන ආකල්ප දැඩි ලෙස හැඩගස්වයි. එහි ප්රතිඵලයක් ලෙස, විවිධත්වය පිළිබඳ මධ්යස්ථ සාකච්ඡා පවා සදාචාරාත්මක හෝ සංස්කෘතික තර්ජන බවට පත්ව ඇති බව කණගාටුවෙන් වුව ද පැවසිය යුතුය.
විශ්ලේෂකයන් කිහිපදෙනෙකු පෙන්වා දෙන්නේ මෙම සිද්ධිය දේශපාලන වාසි සඳහා භාවිතා කරමින් ආණ්ඩුව හා අධ්යාපන ප්රතිසංස්කරණ අපකීර්තියට පත් කිරීමට උත්සාහයන් ක්රියාත්මක වන බවයි. LGBTQIA+ ප්රශ්න භීතියක් ලෙස භාවිතා කිරීම දේශපාලනය තුළ නව කරුණක් නොවන බවත් එය දේශපාලනයේ දිගු ඉතිහාසයක් ඇති උපායමාර්ගික අවියක් බවත් ඔවුහු සඳහන් කරති.
LGBTQIA+ විරෝධී කණ්ඩායම් නැවත කරලියට
මානව හිමිකම් ක්රියාකාරීන් අනතුරු අඟවන්නේ මෙම පෙළපොත් ගැටළුව මඟින් LGBTQIA+ විරෝධී කණ්ඩායම් වලට නැවත වේදිකාවක් නිර්මාණය වී ඇති බවයි. “දරුවන් ආරක්ෂා කිරීම” සහ “සංස්කෘතිය රැකීම” යන නාමයෙන් ඔවුහු සමාජ මාධ්ය, ආගමික වේදිකා සහ දේශපාලනය භාවිතා කරමින් සමරිසි ප්රජාවන් දරුවන්ට සහ සංස්කෘතියට අනතුරු ලෙස නිරූපණය කිරීමට ද්වේෂ සහිත වාග්විධාන ප්රචාරය කිරීමට කටයුතු කරති.
“සම්ප්රදාය ආරක්ෂා කිරීම” යන ධජය යටතේ මෙවැනි ප්රවණතා දැනටමත් සමාජයේ අවදානමකට ලක් වූ කණ්ඩායමක් වන LGBTQIA+ ප්රජාව තවත් හුදකලා කරමින් අධ්යාපන ප්රමිතීන් පිළිබඳ වූ සාධාරණ සංවාදය යටගියාවක් බවට පත්වී ඇති බව විවේචකයහු පවසති.
පුළුල් පරීක්ෂණයක අවශ්යතාවක්?
මෙම සිද්ධියේ සංවේදීභාවය සැලකිල්ලට ගනිමින් සම්පූර්ණ සහ විනිවිදභාවයකින් යුතු පරීක්ෂණයක අවශ්යතාවය පිළිබඳ එකඟතාව වර්ධනය වෙමින් පවතී. CID සහ අභ්යන්තර සමාලෝචන මගින් තනි පුද්ගල දොස් පැවරීමෙන් ඔබ්බට ගොස් විෂයමාලා සංවර්ධනය, කතුවැකි අධීක්ෂණය සහ ඩිජිටල් අන්තර්ගත පරීක්ෂාවන්හි පද්ධතිමය අසාර්ථකත්වයන් සම්පූර්ණයෙන්ම විමර්ශනය කළ යුතු බවට ඉල්ලීම් මතු වී ඇත.
අධ්යාපන ප්රතිසංස්කරණ යනු සමාජ වටිනාකම්, විශ්වාසයන් සහ අපේක්ෂාවන්ට සෘජුව සම්බන්ධ වන දේවල් බව මෙම සිද්ධිය නැවත මතක් කර දෙයි. දරුවන්ගේ ආරක්ෂාව, සංස්කෘතික සංවේදීභාවය සහ මානව ගරුත්වය අතර සමතුලිතතාවය රඳවාගෙන ඉදිරියට යාම සමාජය බිඳ වැටීමකින් තොරව අධ්යාපනය දියුණු කිරීමට අත්යවශ්ය බව විශේෂඥයහු අවධාරණය කරති.
