කොළඹ LNW:රට තුළ වරින් වර මතුවන සහල් හිඟය අවසන් අකර සහල් මිල පාලනය කරමින් ගොවියාට සහතික මිලක් ලබාදීම වෙනුවෙන් මෙවර මාස් කන්නයේ වී අස්වැන්න සතොස හා වී අලෙවි මණ්ඩලය හරහා මිලදී ගැනීමට හා සහල් නිෂ්පාදනය කර බෙදා හැරීම රජයේ අරමුණ බව වෙළෙඳ හා වාණිජ අමාත්‍ය වසන්ත සමරසිංහ මහතා පැවසුවේය.
අනුරාධපුර ඔයා මඩුව ප්‍රදේශයේ ඉදිකර ඇති රජයේ වී ගබඩා පිළිබඳව සොයා ලැබීම සඳහා සිදුකළ නිරීක්ෂණ චාරිකාවෙන් අනතුරුව මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළේය.
රටේ වී නිෂ්පාදනයෙන් 30%කට ආසන්න ප්‍රමාණයක් මහ මෝල් හිමියන් විසින් මිලදී ගන්නා අතර ඉතිරි නිෂ්පාදන සුළු හා මාධ්‍ය පරිමාණ සහල් මෝල් හිමියන් විසින් මිලදී ගන්නා බවත් වෙළෙඳපොළ තුළ පවතින අසමානතාව අවම කිරීම සඳහා රජයද වී මිලදී ගැනීමට කටයුතු කරන බවයි අමාත්‍යවරයා පැවසුවේ.
පසුගියදා ඇති වූ සහල හිඟයට පිළියමක් ලෙස පසුගිය 31 වැනිදා වන විට මෙරටට සහල් මෙට්‍රික් ටොන් 86,000ක් ආනයනය කිරීමට රජය පියවර ගෙන තිබුණි. මේ අතරේම ආනයන සීමාව එළඹෙන 10 වැනිදා දක්වා ක්‍රියාත්මක වන අතර එම දිනයෙන් පසු ආනයන කිරීමේ නිදහස් සීමාව ඉවත් කරන බවද අමාත්‍යවරයා කියාසිටියේය.
කෙසේවෙතත් සහල් වෙළෙඳපොළ මාෆියාව පරාජය කිරීමට රජය මැදිහත් වන බව පසුගිය දිනවලදී ජනාධිපතිවරයා අවධාරණය කරන ලදී.
ආශිකා බ්‍රාහ්මණ
