මනුෂ්‍ය ඝාතනයක් සම්බන්ධයෙන් චෝදනා එල්ල වූ සැකකරුවකු අද (06) අලුයම පොලිස් වෙඩි පහරකින් ජීවිතක්ෂයට පත්ව තිබේ.
මෙසේ මියගොස් ඇත්තේ දෙල්වල – පිටකන්ද, උඩකරවිට ප්‍රදේශයේ පදිංචි 32 හැවිරිදි පුද්ගලයෙකි.
ඔහු, පසුගිය දෙසැම්බර් 18 වනදා හංවැල්ල ප්‍රදේශයේදී පුද්ගලයකු වෙඩිතබා ඝාතනය කිරීමේ සිද්ධිය සම්බන්ධයෙන් අත් අඩංගුවට ගැනීමට අවශ්‍යව සිටි සැකකරුවකු බවයි පොලිසිය පවසන්නේ.
අද අලුයම හංවැල්ල – දිද්දෙණිය, කිඹුල්බෙනය ප්‍රදේශයේදී ඔහුව අත් අඩංගුවට ගැනීම සඳහා බස්නාහිර පළාත් දකුණු දිසා අපරාධ කොට්ඨාසයේ නිලධාරීන් මෙහෙයුමක් දියත් කර ඇති අතර අත් අඩංගුවට ගැනීමට යාමේදී සැකකරු පොලිසියට වෙඩිතබා ඇති බවත් එහිදී පොලිසිය එල්ල කළ ප්‍රතිප්‍රහාරයෙන් සැකකරු තුවාල ලැබූ බවත් පොලිසිය සඳහන් කරයි.
තුවාල ලැබූ සැකකරු අවිස්සාවේල්ල රෝහලට ඇතුළත් කිරීමෙන් අනතුරුව මියගොස් ඇත.
RN
