ශ්‍රී ලංකා නිදහස් පක්ෂය අලුතින් බිහිකෙරුණු නිදහස් ජනතා සන්ධානයෙන් ඉවත් වන්නේද, නැද්ද යන්න පිළිබඳ විශේෂ සාකච්ඡාවක් අද (15) ශ්‍රීලනිප මූලස්ථානයේදී පැවැත්වීමට නියමිත බව වාර්තා වේ.
පාස්කු ප්‍රහාරය වළක්වා ගැනීමට ක්‍රියා නොකිරීම තුළින් ශ්‍රීලනිප නායක, හිටපු ජනාධිපති මෛත්‍රීපාල සිරිසේන මහතා වින්දිතයින්ගේ මූලික අයිතිවාසිකම් කඩකර ඇති බවට ශ්‍රේෂ්ඨාධිකරණය පසුගිය 12 වනදා තීන්දු කිරීමත් සමග සන්ධානයේ සෙසු පක්ෂ වෙතින් ඒ මහතාට එල්ල වී ඇති විරෝධය මීට හේතුවී ඇති බව සඳහන්.
විශේෂයෙන්ම නිදහස් ජනතා සන්ධානය එළිදක්වා පැය 24ක් ගත වන්නටත් පෙර මෙවැන්නක් සිදුවීම තුළින් එම සන්ධානයේ දේශපාලන ගමනට දරුණු හානියක් සිදුව ඇති බව එහි සෙසු නායකයින්ගේ මතය වී තිබේ.
මේ සම්බන්ධයෙන් මුලින් ශ්‍රීලනිපයෙන් විමසීමේදී මෛත්‍රීපාල සිරිසේන මහතා ශ්‍රීලනිප නායකත්වයෙන් සහ නිදහස් ජනතා සන්ධානයෙහි සම සභාපතිත්වයෙන් ඉවත් වනු ඇතැයි ප්‍රකාශ කෙරී ඇති බවත් ආරංචිමාර්ග සඳහන් කළේය.
කෙසේවෙතත් මේ වනවිට මෛත්‍රීපාල සිරිසේන මහතා ශ්‍රීලනිප නායකත්වයෙන් ඉවත් වනවා වෙනුවට ඒ මහතා එම තනතුරෙහිම සිටිමින් ශ්‍රීලනිපය හෙලිකොප්ටර් සන්ධානයෙන් ඉවත් කරගැනීමට යෝජනා වී ඇති බවත් ආරංචිමාර්ග පැවසීය.
RN
