සටහන – රුවන් නෙළුගොල්ල
අදානි ග්‍රීන් එනර්ජි සමාගම විසින් ශ්‍රී ලංකාවේ මන්නාරම සහ පූනරින් හි ක්‍රියාත්මක කිරීමට යෝජිත මෙගාවොට් 484ක සුළං විදුලි බලාගාර ව්‍යාපෘති ශ්‍රී ලංකා රජය විසින් අවලංගු කර ඇති බවට පළවන වාර්තා ප්‍රතික්ෂේප කරන බව අදානි සමූහය පවසයි.
එම වාර්තා අසත්‍ය සහ නොමග යවනසුළු ඒවා බවයි අදානි සමූහය වෙනුවෙන් එහි ප්‍රකාශකයකු නිවේදනයක් නිකුත් කරමින් සඳහන් කර ඇත්තේ.
ශ්‍රී ලංකා කැබිනට් මණ්ඩලය විසින් 2024 මැයි මාසයේදී අනුමත කරන ලද ගාස්තු, 2025 ජනවාරි 2 වන දින නැවත ඇගයීමට ගත් තීරණය නව රජය විසින් සිදු කරන ලද සම්මත සමාලෝචන ක්‍රියාවලියක් බවත්, එම සමාලෝචනය රටේ යාවත්කාලීන කරන ලද බලශක්ති ප්‍රතිපත්ති සහ ප්‍රමුඛතා සමග පෙළගැස්වීම සහතික කිරීම අරමුණු කර ගෙන ඇති බවත් ඔවුන් විසින් නිකුත් කරන ලද නිවේදනයෙන් දැක්වේ.
ඒ අනුව මෙම ව්‍යාපෘති අවලංගු කර නොමැති බව පවසන අදානි සමූහය ශ්‍රී ලංකාවේ හරිත බලශක්ති අංශයේ ඩොලර් බිලියන එකක ආයෝජනයක් වෙනුවෙන් සිය කැපවීම අවධාරණය කරන බවත් සඳහන් කර ඇත.
