කොළඹ LNW:විපක්ෂ නායක සජිත් ප්රේමදාස මහතාගේ ප්රධානත්වයෙන් ඉදිරි දේශපාලන කටයුතු සම්බන්ධ තීරණාත්මක සාකච්ඡාවක් අද (05) පාර්ලිමේන්තුවේ විපක්ෂ නායක කාර්යාලයේදී පවත්වා තිබුණි.
ඊට විපක්ෂයේ ප්රධාන පක්ෂ සියල්ලේම නායකයින් සහභාගී වී ඇත.
ඉදිරියේ දී පාර්ලිමේන්තුවේත් ඉන් පිටතත් සාමූහිකව එකට එක්ව කටයුතු කිරීම සම්බන්ධයෙන් විපක්ෂයේ පක්ෂ අතර එකගතාවක් ඇති කර ගැනීම මෙම සාකච්ඡාවේ ප්රධාන අරමුණ වී තිබේ.
ඒ තුළින් වඩාත් ශක්තිමත් පාර්ලිමේන්තුවක් නිර්මාණය කළ හැකි බවත් ආණ්ඩුවේ යහපත් දේට සහය දෙනවා සේම රටට ජනතාවට හානියක් වන ඕනෑම අවස්ථාවක ඊට එරෙහිව ජනතාව වෙනුවෙන් නැගී සිටිය යුතු බවයි එහිදී විපක්ෂ නායකයා කියා තිබුණේ.
මෙහි දී සියලු පක්ෂ නායකයන් පාර්ලිමේන්තුවේ කමිටු කෙරෙහි අවධානය යොමු කරමින් ඉදිරි ක්රියාමාර්ග ගත යුතු බව ද අවධාරණය කර ඇත.
පසුගිය ජනවාරි 29 වැනි දා ද විපක්ෂයේ පක්ෂ සියල්ලගේම නායකයන් සහ විපක්ෂ නායක සජිත් ප්රේමදාස මහතා හමුවී සුවිශේෂී සාකච්ඡාවක් පැවැත්වූ අතර මෙය එම සාකච්ඡාවේ දිගුවක් ලෙස ද ඔවුන් දක්වයි.
මේ අසාකච්ජාව සඳහා විපක්ෂයේ පක්ෂ නායකයන් වන ගයන්ත කරුණාතිලක, ජේ.සී. අලවතුවල, අජිත් පී. පෙරේරා, රිෂාඩ් බදියුදීන්, නාමල් රාජපක්ෂ, දිලිත් ජයවීර, දයාසිරි ජයසේකර, රවී කරුණානායක, ජීවන් තොන්ඩමන්, සිවඥානම් ශ්රීදරන්, පී. සත්යලිංගම්, ඒ. අඩෙක්කලනාදන්, ගජේන්ද්රකුමාර පොන්නම්බලම්, රවුෆ් හකීම්, නසීම් කාරිඅප්පර්, වී රාධාක්රිෂ්ණන්, අනුරාධ ජයරත්න, ඩී. වී චානක, කාදර් මස්තාන් ඇතුළු පිරිසක් එක්විය.
ආශිකා බ්රාහ්මණ
