කොළඹ LNW: ජනතාවගේ බදු බර ඉවත් කරමින් රට සංවර්ධනය සඳහා විධිමත් වැඩපිලිවෙලක් අවශ්‍ය බව එක්සත් ජනරජ පෙරමුණු නායක පාර්ලිමේන්තු මන්ත්‍රී පාඨලී චම්පික රණවක මහතා පවසයි.
වත්මන් රජය දේශීය ණය ප්‍රතිව්‍යුහගතකරණය හඳුන්වා දුන් නමුත් එමගින් මහ බැංකුව සතුව තිබූ මූල්‍ය ශක්තිය බිඳ වැටුණු බවයි රණවක මහතා සඳහන් කරන්නේ.
ඒ අනුව ආර්ථික අස්ථාවරත්වයක් ද නිර්මාණය වී තිබෙන අතර ඊට විසඳුම ලෙස රජය ජනතාවට බදු බර පැටවීමට ක්‍රියාකළ බවට රණවක මහතා චෝදනා කරයි.
සීනි, කිරිපිටි ඇතුළු ආහාර ද්‍රව්‍ය, ඩීසල්, පෙට්‍රල් ආදී ඉන්ධන මත සහ වෙනත් විවිධ ද්‍රව්‍ය මත අයකෙරෙන බදු වැඩි කර තිබෙන බවත් සේවක අර්ථසාධක අරමුදලේ පොළිය සීමා කිරීමට ද රජය පියවර ගත් බවත් පවසන මන්ත්‍රීවරයා තවදුරටත් පවසන්නේ ඒ නිසා සාමාජිකයන්ගේ ප්‍රතිලාභ අඩුවී තිබෙන බවයි.
ASK
