මෙවර පළාත් පාලන මැතිවරණය සඳහා ඉදිරිපත් වන ශ්‍රී ලංකා පොදුජන පෙරමුණේ අපේක්ෂකයින් දැනුවත් කිරීමේ රැස්වීමක් ඊයේ (11) කෑගල්ලේදී පැවැත්වී තිබේ.
ඒ, එම පක්ෂයේ මහලේකම් සාගර කාරියවසම් මහතාගේ ප්‍රධානත්වයෙනි. හිටපු අමාත්‍ය ජොන්ස්ටන් ප්‍රනාන්දු මහතා ඇතුළු පිරිසක් ද ඊට එක්ව සිටියහ.
එහිදී පොහොට්ටුවේ පළාත් පාලන මැතිවරණ අපේක්ෂයින්ගෙන් සාගර කාරියවසම් මහතාට දැඩි දෝෂාරෝපණයක් එල්ල වී ඇති බවයි ආරංචිමාර්ග සඳහන් කළේ.
මැතිවරණ ප්‍රචාරක කටයුතු සඳහා බැසිල් රාජපක්ෂ මහතාගේ හෝ වෙනත් රාජපක්ෂවරුන්ගේ ඡායාරූප ඇතුළත් එකදු පත්‍රිකාවක් හෝ කොළඹින් නොඑවන ලෙස ඔවුන් සාගර කාරියවසම් මහතාට තරයේ ප්‍රකාශ කර ඇති බවත් වාර්තා විය. අවශ්‍යම නම් මහින්ද රාජපක්ෂ මහතාගේ ඡායාරූපය පමණක් භාවිතා කරන ලෙසත් ඔවුන් පවසා ඇත.
එමෙන්ම මැතිවරණයක් පැවැත්විය යුතු බව පවසමින් ඒ වෙනුවෙන් පෙනී සිටීම සම්බන්ධයෙන් ද එම අපේක්ෂකයින් සාගර කාරියවසම් මහතාට බැනවැදී ඇති අතර සාගරලාට අවශ්‍ය වී ඇත්තේ පක්ෂය විනාශ වී යනවා දැකීමට බවටත් එසේ පක්ෂය විනාශ කරමින් ඒ හරහා ගොඩයෑමට සාගරලා උත්සාහ කරන බවටත් ඔවුන් චෝදනා කර ඇති බවත් ආරංචිමාර්ග ප්‍රකාශ කළේය.
RN
