කොළඹ LNW:මේ වන විට තාවකාලිකව නතර කර ඇති මධ්‍යම අධිවේගී මාර්ගයේ පළමු අදිරයේ ඉදිකිරීම් ඉදිරි මාස දෙක තුළ ආරම්භ කරන බව ප්‍රවාහන හා මහාමාර්ග නියෝජ්‍ය අමාත්‍ය ප්‍රසන්න ගුණසේන මහතා පවසයි.
ඊට අදාළ ණය වාරිකය සඳහා චීන එක්සිම් බැංකුවේ අනුමැතිය අපේක්ෂාවෙන් සිටින බවයි නියෝජ්‍ය අමාත්‍යවරයා සඳහන් කරන්නේ.
ජනාධිපති අනුර කුමාර දිසානායක මහතාගේ චීන නිල සංචාරය අතරතුර පැවති සාකච්ඡාවල ප්‍රතිඵලයක් ලෙස එහි ඉදිකිරීම් යළි ආරම්භ කිරීමට නියමිත අතර මධ්‍යම අධිවේගී මාර්ගයේ පළමු අදියර වන කඩවත සිට මීරිගම දක්වා කොටස දිග කිලෝමීටර 37 ක් වෙයි.
එහි ඉදිකිරීම්වලින් 20% ඉක්ම වූ කොටසක ඉදිකිරීම් මේ වනවිට අවසන් කර තිබෙන නමුත් ආර්ථික කඩා වැටීම හමුවේ එම ඉදිකිරීම් සියල්ල අත්හිටුවීමට සිදුවිය.
එමෙන්ම මධ්‍යම අධිවේගී මාර්ගයේ තුන්වැනි අදියරේ ඉදිකිරීම් ද කඩිනම් කිරීමටද කටයුතු යොදා ඇති බව සඳහන්. ඒ අනුව 2026 වසර වනවිට එම මාර්ගය ජනතා අයිතියට පත් කිරීමට රජය අපේක්ෂාවෙන් පසුවෙයි.
පොතුහැර සිට ගලගෙදර දක්වා කොටස මධ්‍යම අධිවේගී මාර්ගයේ තුන්වැනි අදියරට අයත්වන අතර එහි දිග කිලෝමීටර 32.5 කි. එම කොටසේ ඉදිකිරීම් දේශීය ඉංජිනේරුවන්ගේ දායකත්වයෙන් සහ දේශීය අරමුදල්වලින් සිදුකිරීමට නියමිතයි.
ආශිකා බ්‍රාහ්මණ
