එළඹෙන මාර්තු 09 වැනි දින පැවැත්වීමට නියමිත පළාත් පාලන මැතිවරණය පැවැත්වීමට අදාළ කරුණු සම්බන්ධයෙන් අද මැතිවරණ කොමිසම සහ දේශපාලන පක්ෂ නියෝජිතයින් අතර සාකච්ජාවක් පැවැත්වුණු අතර ඉන් අනතුරුව මාධ්‍ය වෙත අදහස් දක්වමින් පක්ෂ නියෝජිතයින් පැවසුවේ මැතිවරණය පැවැත්වීම සම්බන්ධයෙන් නිශ්චිත බවක් නොමැති බවයි.
මේ වන විට රජයේ මුද්‍රණ දෙපාර්තමේන්තුව විසින් මැතිවරණ කොමිසමට දන්වා ඇත්තේ රු. මිලියන 400ක මුදල් ලබා දෙන තුරු ජන්ද පත්‍රිකා මුද්‍රණය කිරීමට නොහැකි බවයි.
මෙය ඉතිහාසයේ නොවූ විරූ දෙයක් බවත් මීට ඉහතදී මැතිවරණ කොමිසම ජන්ද පවත්වා තිබෙන්නේ අත්පිට මුදලට නොවන අතර ජන්දයෙන් පසුව එම මුදල් ප්‍රතිපූරණය කිරීමක් සිදුවන බවයි මෙහිදී පක්ෂ නියෝජිතයින් සඳහන් කළේ.
ඒ අනුව මැතිවරණයට අදාළ මුදල් රජය විසින් නිදහස් නොකිරීමේ අවසන් තුරුම්පුව ගසා තිබෙන බවයි ඔවුන් පෙන්වා දුන්නේ.
මෙය ප්‍රජාතන්ත්‍රවාදය බරපතල අනතුරක හෙලීමක් බවත් මැතිවරණ සටන පසෙකින් තබා මැතිවරණය පවත්වන ලෙස බලකෙරෙන සටන ආරම්භ කිරීමට සිදුව තිබෙන බවද මෙහිදී දේශපාලන පක්ෂ නියෝජිතයින් ප්‍රකාශ කළේය.
ආශිකා බ්‍රාහ්මණ
