රෂිකා හෙන්නායක පෙබරවාරි 17, කොළඹ (LNW):
ගොවියාගේ යහපත උදෙසා වී ගොවිතැන ආරක්ෂා කිරීමේ අරමුණින් මෙවර අයවැයෙන් තීන්දු රැසක් ගෙන ඇති බව , අද (17) පාර්ලිමේන්තුවේ දී අයවැය යෝජනා ඉදිරිපත් කරමින් ජනාධිපතිවරයා පැවසීය.
2024 – 2025 මහ කන්නයේ සිට ප්රමාණවත් වී තොග පවත්වාගෙන යෑමට අපේක්ෂා කරන බවත්, එම කන්නය සඳහා රු මිලියන 5,000ක් වී මිලදී ගැනීමට වෙන්කර ඇතැයි ද පැවසු ජනාධිපතිවරයා, පොහොර සහනාධාරය සඳහා මේ වසරට රු මිලියන 35,000ක් වෙන්කරන බව ද පැවසීය.
කෘෂිකර්මාන්තයට අදාළව යාවත්කාලීන කළ දත්ත සහ තොරතුරු පද්ධතියක් ස්ථාපිත කරන බවත් ජනාධිපතිවරයා පැවසූ අතර, වී සහ සහල් එකතු කිරීමට හා ගබඩා කිරීමට අලෙවි මණ්ඩල පනත සංශෝධනය කිරීමට මෙවර අයවැයෙන් යෝජනා කර ඇත.
රු මිලියන 500ක් කෘෂිකර්මාන්තය මුලික කරගෙන ව්යාපාර ආරම්භ කරන සුළු හා මධ්ය පරිමාණ ව්යවසායකයින් සඳහා වෙන් කරන බවත් ජනාධිපතිවරයා වැඩිදුරටත් කියා සිටියේය.
