ලෝක බැංකුවේ නියෝජ්‍ය සභාපතිවරයෙක් වන මාර්ටින් රේෆර් මහතා අද (25 දා) මෙරටට පැමිණීමට නියමිත අතර ඒ ශ්‍රී ලංකාවේ ප්‍රාථමික සෞඛ්‍ය සේවා පද්ධතිය ලබාගෙන ඇති ප්‍රගතිය නිරීක්ෂණය කර ඉදිරි කටයුතු සඳහා සහාය ලබාදීමේ අරමුණිනි.
හිටපු සෞඛ්‍ය සේවා අධ්‍යක්ෂ ජනරාල්, සෞඛ්‍ය අමාත්‍යාංශයේ ප්‍රාථමික සෞඛ්‍ය සේවා පද්ධතිය සවිබල ගැන්වීමේ ලෝක බැංකු ව්‍යාපෘතියේ අධ්‍යක්ෂ වෛද්‍ය ජයසුන්දර බණ්ඩාර මහතා පවසන්නේ සංචාරය අතරතුර නියෝජ්‍ය සභාපතිවරයා මාරවිල, හලාවත, ප්‍රාදේශීය රෝහල් නිරීක්ෂණය කිරීමට අද (25 දා) යෑමට නියමිත බවයි.
ශ්‍රී ලංකාවේ සෞඛ්‍ය සේවා පද්ධතිය මේ වනවිට මුහුණපා ඇති අර්බුද හමුවේ ගුණාත්මක සේවා ලබාදීමට ලෝක බැංකුවේ සහාය ලබාදීම නියෝජ්‍ය සභාපතිවරයාගේ අවධානය යොමුව තිබෙන බව ද බණ්ඩාර මහතා කීය. එම රෝහල් ප්‍රාථමික සෞඛ්‍ය සේවා පද්ධති සවිබල ගැන්වීමේ ලෝකු බැංකු ව්‍යාපෘතියේ මෙහෙයවීමෙන් ක්‍රියාත්මක වන රෝහලක් බව ද ඒ මහතා කීය.
ජයසුන්දර බණ්ඩාර මහතා වැඩිදුරටත් පැවසූවේ සංචාරයෙන් පසු ලෝක බැංකු නියෝජ්‍ය සභාපතිවරයා ශ්‍රී ලංකාව සම්බන්ධයෙන් ලෝක බැංකුවට ලබාදීමට නියමිත විශේෂ වාර්තාව මගින් මෙරට සෞඛ්‍ය ක්ෂේත්‍රයේ හෙට දවස වෙනුවෙන් තීරණාත්මක ලෙස බලපෑමක් ඇති කරනු ඇති බවයි.
රෂිකා හෙන්නායක
