දුන් පොරොන්දු ඉටුකර ගත නොහැකිව ආණ්ඩුව අසමත් වී ඇති බවත්, එම අසමත්කම හමුවේ ජනතාව විකල්පයක් සොයමින් සිටින බවත් එජාප නායක, පාර්ලිමේන්තු මන්ත්‍රී රනිල් වික්‍රමසිංහ මහතා පවසනවා. එජාප ජ්‍යෙෂ්ටයන් පිරිසක් සමග පැවති සාකච්ඡාවකදී ඔහු මේ බව පවසා තිබේ.
ජාත්‍යන්තරයේද සහාය ඇතිව රට ඉදිරියට ගෙන යා හැකි එකම විකල්පය එක්සත් ජාතික පක්ෂය බව ජනතාවට තේරුම් කළයුතු කාලය එළඹ ඇති බවයි එජාප නායකයා සිය ජ්‍යෙෂ්ටයන් වෙත අවධාරණය කර තිබෙන්නේ. විකල්ප වැඩපිළිවෙලක් සඳහා බලය ලබා ගැනීමට එජාපය සූදානම් වියයුතු බවද ඔහු පවසා තිබෙනවා.
මෙම සාකච්ඡාවේදී ඉන්ධන අර්බුදය සම්බන්ධයෙන්ද එජාප නායකයා දීර්ඝ ලෙස කරුණු දක්වා තිබෙනවා. එහිදී ඔහු පවසා තිබෙන්නේ ලෝක වෙළඳපොලේ බොරතෙල් මිල ඇමරිකානු ඩොලර් 115 ක් දක්වා ඉහළ යා හැකි බවයි.
මේ වනවිට එංගලන්තයද පවුම් දෙකකට ආසන්න ප්‍රමාණයකින් ඉන්ධන මිල ඉහළ දමන බවට නිවේදනය කර ඇති බව පෙන්වා දෙන එජාප නායකයා පවසන්නේ සමස්ත ලෝකයටම ඉන්ධන අර්බුදයකට මුහුණදීමට සිදුව ඇති බවයි.
මේ වනවිටත් ශ්‍රී ලංකාව දැවැන්ත බලශක්ති අර්බුදයකට මුහුණ දී සිටින බවත් ඉදිරියේදී ඉන්ධන මිල වැඩිකිරීම අනිවාර්යෙන්ම සිදුවන බවත් ඔහු සඳහන් කරනවා.
UN
