සටහන – රෂිකා හෙන්නායක
මාර්තු 07 , කොළඹ (LNW):ඉන්දියාවේ ප්‍රකෝටිපති ව්‍යාපාරික මුකේෂ් අම්බානි මහතාගේ බාල පුත් ආනන්ත් අම්බානිගේ විවාහ මංගල උත්සවය පසුගිය දා අතිඋත්කර්ෂවත් අයුරින් ගුජරාටි ප්‍රාන්තයේදී පැවැත්වුණු අතර මෙම මංගල සාදයේ ආහාර පිසීම සඳහා ඉන්දියාවට ගොස් සිටි ලාංකීය සූපවේදීන් පිරිස අද (07) උදෑසන යළි දිවයිනට පැමිණි බව වාර්තා වේ.
එම විවාහ මංගල උත්සවයේ ආහාර පිසීම සඳහා ලංකාවේ සූපවේදීන් 13 දෙනෙකු එක්ව සිටි අතර, ඔවුන් Citrus හෝටල් සමූහය නියෝජනය කරමින් කොළඹ Citrus හෝටලයේ Ceylon Curry Club අවන්හල නියෝජනය කරන සූපවේදීන් පිරිසකි.
මෙම සූපවේදීන් පිරිස පාරිභෝගික ප්‍රතිචාර සහ ගූගල් ඇගයීම් සහ නිර්දේශ මත තෝරා ගෙන තිතිබුණු බව පැවසේ.
මොවුන් අවන්හල තුළ දී ලංකාවටම ආවේනික වූ ආහාරපාන, නවතම ක්‍රමවලට පිළියෙල කර පාරිභෝගිකයින්ට ලබාදී තිබේ.
මෙම සූපවේදීන් 13 දෙනා අතර එක් සූපවේදිනියක් ද ඇතුළත් වී සිටී.
මොවුන් මාර්තු 3 වනදා ආනන්ත් අම්බානිගේ විවාහ මංගල උත්සවයට සහභාගී වන පිරිස සඳහා දිවා ආහාරය පිළියෙල කර ඇති අතර, ඔවුන්ගේ ආහාර සඳහා ලැබුණු ප්‍රතිචාර හේතුවෙන් තවත් අතිරේක දිනයක් ලෙස මාර්තු 4 වන මංගල උත්සව පැවති දින රාත්‍රියේ ද ආහාර පිළියෙල කරන වගකීම පැවරී තිබිණි.
මෙම විවාහ මංගල්‍යය උත්සවය ඉන්දියාවේ ගුජරාටි ප්‍රාන්තයේ “ජාම්” නගරයේ දී අම්බානි මහතාට අයත් පෞද්ගලික සත්වෝද්‍යානයක දී පැවැත්වුණු අතර විවාහ මංගල උත්සවය සඳහා ශ්‍රී ලාංකික සූපවේදීන්ට අමතරව එංගලන්තය, ඩුබායි, චීනය සහ ඉන්දියාව නියෝජනය කරමින් ද පිරිසක් එක්ව සිටි බව වාර්තා වේ
මෙම සූපවේදීන් පිරිස අද උදෑසන 6.20ට ඉන්දියාවේ මුම්බායි සිට ශ්‍රීලන්කන් ගුවන් සේවයට අයත් ගුවන් යානයකින් කටුනායක ගුවන්තොටුපොළ වෙත පැමිණ තිබූ බව සඳහන් වේ.
