ව්‍යාජ තොරතුරු ඉදිරිපත් කර අවිධිමත් රාජ්‍යතාන්ත්‍රික විදෙස් ගමන් බලපත්‍රයක් ලබාගැනීම සම්බන්ධයෙන් පාර්ලිමේන්තු මන්ත්‍රී විමල් වීරවංශ මහතාගේ බිරිඳ වන රණසිංහ රන්දුනු මුදියන්සේලාගේ ශීර්ෂා උදයන්ති නොහොත් ශෂී වීරවංශ මහත්මියට එරෙහිව ගොනුකර ඇති නඩුවේ තීන්දුව මැයි මස 06 වනදා ප්‍රකාශයට පත්කරන බව කොළඹ මහේස්ත්‍රාත් අධිකරණය අද (11) නිවේදනය කළේය.
එම නඩුවේ තීන්දුව ප්‍රකාශයට පත්කිරීමට නියමිතව තිබුණේ අද දිනයේදී ය.
ශෂී වීරවංශ මහත්මියගේ සාමාන්‍ය විදෙස් ගමන් බලපත්‍රයෙහි ඇයගේ උපන්දිනය 1967 වසරේ බවට සඳහන්ව තිබුණු නමුත් ඇය සිය උපන්දිනය 1971 වසරේ බව සඳහන් කරමින් ව්‍යාජ ලේඛන ඉදිරිපත් කර රාජ්‍යතාන්ත්‍රික විදෙස් ගමන් බලපත්‍රයක් ලබාගැනීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් මෙම නඩුව ගොනු කර ඇත.
ඇය මෙම උපන්දින දෙකම වෙනුවෙන් ජාතික හැඳුනුම්පත් දෙකක් සකස් කර ඇති බවත්, ව්‍යාජ උප්පැන්න සහතිකයක් සකස් කර ඇති බවත්, මෙම රාජ්‍යතාන්ත්‍රික විදෙස් ගමන් බලපත්‍රය හදිසි කටයුත්තක් සේ සලකා ඉක්මනින් ලබාදෙන ලෙස එවකට අමාත්‍ය විමල් වීරවංශ මහතා ආගමන විගමන පාලකවරයාට දුරකථනයෙන් අමතා බලපෑම් කර ඇති බවත් නඩු විභාගයේදී අනාවරණය වී තිබිණි.
RN
