රෂිකා හෙන්නායක මාර්තු 12, කොළඹ (LNW):
ගුවන් මගීන්ට සහ ගුවන් සේවිකාවන්ට ලිංගික අතවර කිරීම හේතුවෙන්, ඉන්දියාවේ මුම්බායි නුවර සිට කටුනායක ගුවන්තොටුපොළ වෙත පැමිණි ගුවන් යානයක ගමන් ගත් ගුවන් මගියෙකු අත්අඩංගුවට ගෙන තිබෙන බව වාර්තා වේ.
ඒ අනුව අද (12) අලුයම ගුවන් තොටුපොළ පොලීසිය මඟින් අදාළ මගියාව අත්අඩංගුවට ගෙන තිබුණ බව වාර්තා වේ..මෙලෙස අත්අඩංගුවට ගෙන ඇත්තේ ස්වීඩනයේ සහ යාපනය, නාගද්වීපය ප්‍රදේශයේ පදිංචි, දෙරටෙහිම ද්විත්ව පුරවැසිභාවයහිමි 65 හැවිරිදි අයෙක් වේ.
ගුවන් තොටුපල නිලධාරීන් සඳහන් කළේ, මොහු අද අලුයම 12.45ට ඉන්දියාවේ මුම්බායි නුවර සිට ශ්‍රීලන්කන් ගුවන් සේවයේ යූ.එල්-144 දරන ගුවන් යානයෙන් කටුනායක ගුවන් තොටුපොළ වෙත පැමිණෙමින් සිටියදී, අධික ලෙස මත්පැන් පානය කර තිබෙන බවයි.
ඉන් අනතුරුව එම ගුවන් යානය තුළ සිටි මගීන්ට කරදර වන ආකාරයට හැසිරීමට පටන් ගෙන ඇති අතර පසුව එම යානය තුළ සේවය කළ ගුවන් සේවිකාවන් දෙදෙනෙකු වෙත ලිංගික අතවර කිරීමට ද ඔහු තැත් කර තිබෙන බව වාර්තා වේ. පසුව ගුවන් යානයේ ආරක්ෂක නිලධාරීන් ඔහු මැඩ පවත්වා තිබූ අතර, මෙම සිදුවීම පිළිබඳව, ගුවන් නියමුවා දැනුවත් කිරීමට ද පියවර ගෙන තිබුණා.
ඒ අනුව සිදුකළ දැනුවත් කිරීම අනුව ගුවන්යානය කටුනායක ගුවන් තොටුපොළ වෙත ගොඩ බැස්සවීමෙන් පසුව, ශ්‍රීලන්කන් ගුවන් සේවයේ ආරක්ෂක නිලධාරීන්, ගුවන් තොටුපොළ පොලීසිය සමග පැමිණ, මෙම ගුවන් මගියා අත්අඩංගුවට ගෙන ඇත.
ගුවන් මගියාව පොලීසිය විසින් වෛද්‍ය පරීක්ෂණයක් සඳහා යොමු කර තිබූ අතර, එහිදී ඔහු මත්පැන් පානය කර ඇති බවට කරුණු සනාථ වී ඇත. අද(12) දින කොළඹ ප්‍රධාන මහෙස්ත්‍රාත් අංක 01 අධිකරණය වෙත ගුවන් මඟියා ඉදිරිපත් කිරීමට නියමිත බව වැඩිදුරටත් වාර්තා වේ.
