69 ලක්ෂයේ ජනවරම දුර්වර්ණ කරන ආණ්ඩුවකින් ලබාදුන් තනතුරක් දැරීම තම හෘදසාක්ෂියට අනුකූල නොවන බව ශ්‍රී ලංකා පොදුජන පෙරමුණේ නුවරඑළිය දිස්ත්‍රික් පාර්ලිමේන්තු මන්ත්‍රී, ජාතික නිදහස් පෙරමුණේ නියෝජ්‍ය ලේකම් නිමල් පියතිස්ස මහතා පවසනවා.
ඒ අනුව ඔහු, නුවරඑළිය දිස්ත්‍රික්කයේ කොත්මලේ ප්‍රාදේශීය සම්බන්ධීකරණ කමිටුවේ සභාපති ධුරයෙන් ඉල්ලා අස්වීමට පියවර ගෙන තිබේ. ඊට අදාල ඉල්ලා අස්වීමේ ලිපිය අද (14) ජනාධිපති ගෝඨාභය රාජපක්ෂ මහතා වෙත යොමු කරන බවයි මන්ත්‍රීවරයා අද පැවති මාධ්‍ය හමුවකදී සඳහන් කළේ.
ආණ්ඩුව සහ ජනාධිපතිවරයා, පසුගිය ජනාධිපතිවරණයේදී ලබාදුන් 69 ලක්ෂයේ ජනවරමට පිටුපාමින් සිටින බවත්, එම ජනවරම නිර්මාණය කිරීම සඳහා සුවිශේෂ දායකත්වයක් දැක්වූ දේශපාලන පක්ෂ නායකයන් දෙදෙනක් ඇමති ධුරවලින් පහ කිරීමට තීරණය කිරීම කිසිසේත්ම පිළිගත නොහැකි බවත් පියතිස්ස මහතා සඳහන් කරනවා. ආණ්ඩුව වෙත තිබූ ජනතා ප්‍රසාදය දිනෙන් දිනම හීනවෙමින් යන බව පෙන්වා දෙන මන්ත්‍රීවරයා පවසන්නේ ගොවි ජනතාව ඇතුළු සමස්ත ජන කොටස්වලින් ආණ්ඩුවට දැඩි විරෝධයක් එල්ලවෙමින් තිබෙන බවයි.
මෙම තත්වය මත ජනතා මතයට පටහැනිව ගමන් කරන ආණ්ඩුවක් මගින් ලබාදුන් තනතුරු තවදුරටත් දැරීම සිය හෘදසාක්ෂියට අනුකූළ නොවන බව ඔහු වැඩිදුරටත් සඳහන් කරයි.
විමල් වීරවංශ මහතා සහ උදය ගම්මන්පිල මහතා කැබිනට් ඇමති තනතුරුවලින් පහ කිරීමෙන් පසුව ජානිපෙ නියෝජනය කරන ජයන්ත සමරවීර මහතාද සිය රාජ්‍ය අමාත්‍ය ධුරයෙන් ඉල්ලා අස්වීමට කටයුතු කළේය.
UN
