සෞඛ්‍ය අමාත්‍යාංශ පරිශ්‍රයේ වසර 10ක් තිස්සේ විවිධ කටයුතුවල නියැළුණු අමුතුම තාලේ පුද්ගලයෙකු අපරාධ පරීක්ෂණ දෙපාර්තමේන්තුවට කොටුවී ඇති බව වාර්තා වේ.
කිසිදු ආකාරයකින් සෞඛ්‍ය අමාත්‍යාංශයේ සේවකයකු හෝ වෙනත් ආකාරකින් අමාත්‍යාංශයට සම්බන්ධ පුද්ගලයෙකු හෝ නොවන මොහු නිරන්තරයෙන් සෞඛ්‍ය අමාත්‍යාංශය පරිශ්‍රය තුළ සැරිසරන්නෙකු වන අතර එහි සෑම අංශයකටම යෑමට ඒමට හැකියාව ඇති අයෙකි. ඒ හැකියාව කොතරම් බලගතුද යත් ඔහුට වෛද්‍යවරුන්ගේ පෞද්ගලික ලිපිගොනුවලට පවා ප්‍රවේශය තිබී ඇති බව සඳහන්. ඒ සම්බන්ධකම් හරහා ඔහුට වෛද්‍යවරුන්ගේ ස්ථාන මාරුවීම් පවා වෙනස් කරවීමේ බලයක් තිබී ඇති බව කියැවේ.
මොහු සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිල්ලක් ලැබී ඇති අතර ඒ අනුව CID නිලධාරීන් කණ්ඩායමක් එම පැමිණිල්ල පිළිබඳ විමර්ශන කටයුතු සඳහා සෞඛ්‍ය අමාත්‍යාංශයට ගොස් ඇත. ඒ වනවිටත් අදාළ පුද්ගලයා සෞඛ්‍ය අමාත්‍යාංශ පරිශ්‍රය තුළ සිට ඇත. ඔහු එතරම්ම සෞඛ්‍ය අමාත්‍යාංශය තුළ ගැවසෙන්නෙකි.
එහිදී සෞඛ්‍ය අමාත්‍යාංශ නිලධාරීන් විසින් මේ පුද්ගලයාව CID නිලධාරීන්ට පෙන්වා ඇති අතර CID නිලධාරීන් ඔහුව එම ස්ථානයේම රඳවාගෙන පැය තුනක් පමණ ඔහුගෙන් ප්‍රශ්න කර තිබේ. ඉන් අනතුරුව අවශ්‍ය වුවහොත් ඔහුව නැවතත් CIDයට කැඳවන බව පවසමින් ඔහුව මුදාහැරීමට එම නිලධාරීන් කටයුතු කර ඇති බවත් ආරංචිමාර්ග සඳහන් කළේය.
මෙසේ ප්‍රශ්න කර ඇත්තේ මොහොමඩ් නසාර් නිස්මතුල්ලා නමැති අයෙකුගෙන් බවත් ආරංචිමාර්ග වැඩිදුරටත් පැවසීය.
මෙම සිද්ධිය සම්බන්ධයෙන් CIDයෙන් අප කළ විමසීමකදී එහි නිලධාරියෙකු අප වෙත සඳහන් කළේ මෙම පුද්ගලයාව වැඩිදුර විමර්ශන සඳහා නැවතත් කැඳවීමට නියමිත බවකි.
