රෂිකා හෙන්නායක මාර්තු 21, කොළඹ LNW :
රාමසාන් උපවාසය යනු හුදෙක් ආගමික වතාවතක් පමණක් නොව, එය අනුන්ගේ කුසගින්න හඳුනාගනිමින් සහකම්පනය, පරිත්යාගය සහ සහෝදරත්වය ප්රගුණ කරන කාලයක් බව ජනාධිපති අනුර කුමාර දිසානායක මහතා අවධාරණය කරයි.
ලෝකය මුහුණ දී සිටින අභියෝගාත්මක තත්ත්වයන් හමුවේ සාමය, සමානාත්මතාවය සහ මානුෂීය ගුණාංග පෙරදැරි කරගත් සහජීවී සමාජයක් ගොඩනැගීමේ අවශ්යතාවය ජනාධිපතිවරයා පෙන්වා දෙයි.
රටේ ආර්ථිකය සහ ජනජීවිතය නගාසිටුවීමට රජය කැපවී සිටින බව පවසන එතුමා, ඒ සඳහා ජාති භේදයකින් තොරව සියලු දෙනාගේ සහාය අපේක්ෂා කරයි. ශ්රී ලාංකික සහ ලෝකවාසී මුස්ලිම් ජනතාවට ආධ්යාත්මික සුවය සහ සෞභාග්යය පිරි සුබ ඊදුල් ෆිතර් දිනයක් වේවායි මෙයින් ප්රාර්ථනා කෙරේ.
ජනාධිපතිවරයාගේ පණිවුඩය...
ලොව පුරා ඉස්ලාම් භක්තිකයන් විසින් මාසයක් පුරා උපවාස ශීලය රකිනු ලැබීමෙන් අනතුරුව නව සඳ බැලීමෙන් පසු සැමරෙන ඊදුල් ෆිතර් උත්සවය ඉස්ලාමීය ආගමික දින දර්ශනයේ අතිශය වැදගත් අවස්ථාවකි.
ඉස්ලාම් ධර්මය ගොඩනැගී ඇති කුලුනු පහෙන් එකක් වන රාමසාන් උපවාසය පිළිබිඹු කරන්නේ ලෞකික ආශාවන්ගෙන් දුරස් වී පරිත්යාගය සහ අල්පේච්ඡත්වය සහිත පරමාදර්ශී පිළිවෙතක පිහිටීමේ වැදගත්කමයි.
රාමසාන් සැමරුම සමස්ත ලෝක ප්රජාවට ඉතාම වැදගත් මානුෂීය සහ සමාජයීය පණිවිඩ රැසක් රැගෙන එන්නකි. රාමසාන් සැමරුමේ මුදුන් අර්ථය බැතිමතුන්ගේ හදවත් තුළ සහකම්පනය රෝපණය කිරීමයි. එනම්, අනෙකාගේ කුසගින්න, එහි වේදනාව තමන්ගේ අත්දැකීමක් කර ගනිමින් සහකම්පනීය සහ සහෝදර හැඟීමෙන් අනෙකාව වැළඳගැනීමට නොපැකිළෙන පුද්ගලයන් ගොඩනැඟීමයි. එම කාලය තුළ රාමසාන්හි සෙසු අර්ථ වන, සාමය, සමානාත්මතාව, සහජීවනය යන උතුම් ගුණාංගවලින් බැතිමතුන්ගේ චර්යාව පෝෂණය වේ. ඔවුන් පුරා මාසයක කාලයක් රාමසාන් උපවාස පිළිවෙත් ඉටු කරන අතර, එම කාලය ඔවුන්ගේ අධ්යාත්මික සුපෝෂණය සඳහා වන කාලයයි. එබැවින්, රාමසාන් සමය යනු ලෝකයට ජීවනාදර්ශයෙන් මනුෂ්යත්වයේ පාඩම සහ සහෝදරත්වය කියා දෙන සමයකැ’යි මම විශ්වාස කරමි.
මෙවර ඊදුල් ෆිතර් උත්සවය සමරන්නට සිදුව ඇත්තේ සමස්ත ලෝකයම දුෂ්කර සහ අභියෝගකාරී තත්ත්වයකට මුහුණ දී සිටින අවස්ථාවකය. මෙම රාමසාන් මාසයේ පිරූ වත්-පිළිවෙත් සහ යාඥාවේ ආශිර්වාදයෙන් මෙම තත්ත්වය කඩිනමින් පහව ගොස් සියලු දෙනා අපේක්ෂා කරන, සියලු දෙනාගේ අයිතිවාසිකම් සහ නිදහස සුරැකෙන, සාමය, සෞභාග්යය රැඳෙන සහජීවී ලෝකය බිහි වේවා’යි මම ප්රාර්ථනා කරමි.
එමෙන්ම, සෙසු අභියෝගවලට සාර්ථකව මුහුණ දුන්නා සේ මෙම අභියෝගයටද අභීතව මුහුණ දෙමින්, එය මනාව කළමනාකරණය කර, මෙරට ආර්ථිකයත්, ජන ජීවිතයත් පීඩාවකින්, බිඳවැටීමකින් තොරව ඉදිරිගාමීව පවත්වාගෙන යාම වෙනුවෙන් අපි රජයක් ලෙස තිර අදිටනින් යුතුව කැප වී සිටිමු.
භේද පසෙකලා එම වැඩපිළිවෙළ සමඟ මුළු බඳිමින් ඊට අවැසි සවිමත් අත්වැල සපයන ලෙසට සෑම සියලු දෙනාට ආරාධනා කරමින්, ශ්රී ලාංකික මෙන්ම ලෝ වැසි සහෝදර මුස්ලිම් ජනතාවට සාමය සහ සංහිඳියාව සපිරි ඊදුල් ෆිතර් දිනයක් වේවා’ යි මාගේ හෘදයාංගම සුබපැතුම් පිරිනමමි.
ඊද් මුබාරක්!
අනුර කුමාර දිසානායක
ජනාධිපති
ශ්රී ලංකා ප්රජාතාන්ත්රික සමාජවාදී ජනරජය
2026 මාර්තු 21 වන දින
