අධිකරණයට අපහාස වන අයුරින් හැසිරීම සහ අසත්ය කරුණු අධිකරණයට ඉදිරිපත් කිරීම යන චෝදනා මත පුත්තලම මහාධිකරණය හමුවේ පෙනී සිටි නීතීඥවරියක් රක්ෂිත බන්ධනාගාරගත කිරීමට පුත්තලම මහාධිකරණ විනිසුරු නදී අපර්ණා සුවන්දුරුගොඩ මහත්මිය පසුගියදා (28) නියෝග කර තිබිණි.
අදාළ නීතීඥවරියට මෙම චෝදනා එල්ල කරමින් නඩුවක් ගොනුකර ඇත්තේ පුත්තලම මහාධිකරණයේ ලේකඛාධිකාරීවරිය විසිනි. ඒ අනුව ඇප කොන්දේසි සම්පූර්ණ කරන තෙක් එම නීතීඥවරියව රිමාන්ඩ් භාරයේ තබන ලෙස මහාධිකරණ විනිසුරුවරිය නියෝග කර තිබූ බව සඳහන්.
මේ සම්බන්ධයෙන් සොයා බැලීමේදී පුත්තලම මහාධිකරණ ආරංචිමාර්ග සඳහන් කළේ අදාළ නීතීඥවරියට අධිකරණයට අපහාස වන පරිදි හැසිරීම පිළිබඳ චෝදනා එල්ල වී ඇත්තේ ඇය නාභිය පෙනෙන ආකාරයෙන් සාරිය ඇඳීම නිසා බවයි. නාභිය පෙනෙන ලෙස සාරිය නොඅඳින්නැයි මීට පෙර විනිසුරුවරිය අදාළ නීතීඥවරිය කැඳවා අවවාද කර තිබුණු බවත් ආරංචිමාර්ග පැවසීය.
කෙසේවෙතත් ඇයට ගොනුකර ඇති චෝදනා පත්රය අප වෙත මේ වනවිට ලැබී ඇති අතර එහි දැක්වෙන්නේ ඇය අධිකරණ ශාලාවට ඇතුළුවීමේදී හිස නමා ආචාර නොකිරීම සහ මීට අදාළ නඩුවේ ඇප අයැදීමේදී මහාධිකරණ විනිසුරුවරියට ගෞරවාන්විතව ඇමතීම චේතනාන්විතව පැහැර හැරීම යන වැරදි තුළින් අධිකරණයට අපහාස කර ඇතැයි චෝදනා කර ඇති බවකි.
