කොළඹ LNW:ගිය වසරට වඩා ඖෂධ වර්ග හතරකින් රු මිලියන 1750ක් ඉතුරු කර තිබෙන බව පාර්ලිමේන්තු මන්ත්‍රී වෛද්‍ය නජිත් ඉන්දික මහතා පවසයි.
එය පසුගිය අයවැය විවාදයේදීද අවධානයට යොමුව තිබුණි.
මෙය ආණ්ඩුව විසින් කරන ලද මැජික් එකක් නොවන අතර නිසි ක්‍රමවේදය ඔස්සේ යාමට සැලැස්වීමෙන් එම මුදල ඉතුරු කර තිබෙන බවයි මන්ත්‍රීවරයා සඳහන් කරන්නේ
මන්ත්‍රීවරයා මේ බව පැවසුවේ ඊයේ (31) කොළඹ වනාතවිල්ලුවේ පැවති පළාත් පාලන මැතිවරණ ප්‍රචාරක හමුවක් අමතමිනි.
ඒ අනුව වත්මන් ආණ්ඩුව එලෙස නිසි මඟ යමින් මුදල් ඉතුරු කරන විට පසුගිය රජයේ සෞඛ්‍ය අමාත්‍ය කෙහෙළිය රඹුක්වැල්ල විසින් ඖෂධ එන්නත් වෙනුවට වතුර පිරවීම ගැන නිල වාර්තාව මේ වන විට නිකුත් වී තිබෙන බවද නජිත් ඉන්දික මහතා කියාසිටියේය.
එපමණක් නොව ඖෂධ හිඟයක් ඇති බවට කැබිනට්ටුවද නොමඟ යවන ලද කැබිනට් පත්‍රිකාව සකස් කිරීම ද සිදුකර ඇත්තේ කෙහෙළිය රඹුක්වැල්ල හිටපු ඇමතිගේ උපදෙස් මත බවට හෙළිදරව් වී ඇත.
ඒ අනුව පසුගිය සමයේ සිදුවූ ඖෂධ වංචාව හේතුවෙන් මෙරට පුද්ගලයින් 17කුගේ ඇස් අන්ධභාවයටද පත් වූ අතර මරණද වාර්තා විය.
ආශිකා බ්‍රාහ්මණ
