රෂිකා හෙන්නායක
බණ්ඩක්කා කියන්නේ ඉතා ම ගුණදායක එළවලුවක්. ඒත් පොඩ්ඩො වගේ ම වැඩිහිටියොත් බණ්ඩක්කා කන්න ටිකක් හොරයි. නමුත් ඉතාම පෝෂණීය බණ්ඩක්කා වල ඇති අපූරු පෝෂණැ ගුණය පිළිබඳ බොහෝ දෙනෙක් නොදන්නා පැත්ත ගැන අද කෙටි සටහක් තබන්නට සිතුවෙමි.
බණ්ඩක්කාවල ඔබ නොදන්නා ගුණ 10ක්
- බණ්ඩක්කාවල අඩංගු ලෙක්ටින් නම් ප්‍රෝටීන් වර්ගය පියයුරු පිළිකා වළක්වනවා. එහි අඩංගු ෆෝලේට් ද පියයුරු පිළිකා වළක්වන්නට උපකාරී වෙනවා.
- බණ්ඩක්කා රුධිරගත සීනි මට්ටම අඩු කරනවා. දියවැඩියාවෙන් පෙළෙන අයට බණ්ඩක්කා විශිෂ්ට ආහාරයක්.
- තන්තු අධික ආහාරයක් ලෙස බණ්ඩක්කා හඳුනාගන්නවා. මළ බද්ධයෙන් පීඩා විඳින අයට බණ්ඩක්කා දිව ඔසුවක් වගෙයි. ඒ වගේ ම තන්තුමය ගුණය නිසා හදවත් රෝග වැළකීමේ හැකියාවත් මේවා සතු යි.
- විටමින් K ඔබේ අස්ථි ශක්තිමත් කරනවා. බණ්ඩක්කා ආහාරයට ගැනීම අස්ථිවල සෞඛ්‍යයට බලපාන්නේ ඒ අයුරින්.
- එහි අඩංගු තන්තුමය ගුණය නිසා සහ කැලරි අඩු වීම නිසා ඔබේ කුස පිරුණු හැඟීමක් ගෙන එනවා. ආහාර පාලනය කරන අයට ඉතාම සුදුසු එළවලුවක් ලෙස හඳුනාගන්න පුළුවන්.
- විවිධ ගුණ ඇති බණ්ඩක්කාවලට ඔබේ ප්‍රතිශක්තිය ඉහළ නංවන්නත් පුළුවන්. වෛරස් රෝග බහුල මෙවන් සමයක බණ්ඩක්කා අමතක කළ නොහැකියි.
- ෆෝලේට් ඔබේ සරුබවට මෙන් ම ගර්භනීබවට ද එක සේ බලපානවා. දරුවන් බලාපොරොත්තුවෙන් ඉන්න ඔබ නිතර භාවිතා කළ යුතු ආහාරයක් තමයි මේ.
- මොළය වර්ධනය කරන ආහාර අතුරෙන් එකක් ලෙස බණ්ඩක්කා හඳුනා ගැනෙනවා. ඉගෙන ගන්නා වයසේ අය බණ්ඩක්කා ආහාරයට ගන්නම ඕනේ ඒ නිසා.
- බණ්ඩක්කාවල අඩංගු විටමින් A ඇස්වල සෞඛ්‍යය සුරකිනවා.
- විටමින් C ප්‍රභවයක් වන මේවා නිතර ආහාරයට ගැනීමෙන් ඔබට පැහැපත්, නීරෝගී සමක් උරුම කරගන්නට පුළුවන්.
බණ්ඩක්කා රසට හදන්නේ මෙහෙමයි.
අවශ්‍ය ද්‍රව්‍ය
- ළපටි බණ්ඩක්කා 500g
- කහ කුඩු තේ හැඳි බාගයක්
- මිරිස්කුඩු මේස හැන්දක්
- බැදපු තුනපහ කුඩු මේස හැන්දක්
- අබ තේ හැඳි බාගයක්
- උළුහාල් තේ හැඳි බාගයක්
- උකුපොල් කිරි කෝප්ප බාගයක්
- තක්කාලි ගෙඩියක් හෝ සියඹලා ටිකක්
- අමු මිරිස් කරල් දෙකක්
- සුදුළූනු බික් හතරක්
- කරපිංචා සහ රම්පෙ
- බී ලූණු ගෙඩියක්
- තෙල්
හදන්නේ මෙහෙමයි
- බණ්ඩක්කා හොඳින් සෝදා අඟලේ පමණ කැබලි කපා ගන්න.
- ඒවා ගැඹුරු තෙලේ තරමක් අවපැහැවන තුරු බැදගෙන තෙල් බේරෙන්නට තබන්න.
- දැන් වෙනත් වළඳකට තෙල් තේ හැන්දක් දමන්න.
- එයට අබ සහ උළුහාල් දමා පුපුරවන්න.
- එයට කහ, මිරිස් සහ තුනපහ දමා බැදෙන්නට දෙන්න.
- සුදුළූණු, බීලූණු, කරපිංචා, රම්පෙ එක් කර සුවඳ එන තෙක් බදින්න.
- දැන් එයට පොල් කිරි සහ බණ්ඩක්කා හැර ඉතිරි සියල්ල දමා නටන තෙක් උයාගන්න.
- හොද්ද නටන විට ම බණ්ඩක්කා එක් කර විනාඩි පහක් පමණ මද ගින්දරේ උයාගන්න.
- මේ මොහොතේදී කිරි බණ්ඩක්කාවලට උරාගෙන හොදි හිඳී යයි. එවිට ඉක්මනින් බාගන්න.
මෙසේ පිස ගැනීමෙන් බණ්ඩක්කා රසවත් ආහාරයක් යැයි ඔබට හැඟී යනු ඇත.
