කොළඹ LNW:මහා සෙනගක් සිටියද ජනාධිපතිවරයා තනි වී සිටින අතර ඔහු දැන් හේනේ තනි වී වල් අලි එළවන්න සීපද කියන තැනට වැටී ඇතැයි සමඟි ජන බලවේගයේ පාර්ලිමේන්තු මන්ත්‍රී මුජිබර් රහුමාන් මහතා පැවසුවේය.
ඒ, අද (03) සමඟි ජන බලවේගයේ මාධ්‍ය හමුවේදීය.
ජනාධිපතිවරයා පැවසූ අන්දමට දැන් ඔහුට අභියෝගය ඇත්තේ පක්ෂය අභ්‍යන්තරයෙන්ම බවයි මන්ත්‍රීවරයා කියාසිටියේ.
එසේ වී ඇත්තේ මෙතෙක් කල් ගොඩනැගූ දේශපාලන ව්‍යාපාරයේ මතවාදයට එරෙහිව බලයට පත්වූ පසු ක්‍රියාත්මක වෙමින් සිටින හෙයින් යැයි රහුමාන් මහතා සඳහන් කළේය.
සමාජවාදය හදනවා,ධනපති පන්තිය විනාශ කරනවා,නිර්දන පන්තියේ ආඥාදායකත්වය හදනවා යනුවෙන් මතය හැදුවද එය දැන් සිදු නොවන අතර ජවිපෙ පාක්ෂිකයන් රවටා ඇති බවටයි සමඟි මන්ත්‍රීවරයා ප්‍රකාශ කළේ.
දෑ කැත්ත සහ මිටිය වෙනුවට IMF ඇදුම් ඇඳ ගත්විට ජනාධිපතිවරයාට එරෙහිව කැරැල්ල පක්ෂය අභ්‍යන්තරයෙන්ම පැමිණෙන බව රහුමාන් මහතා අවධාරණය කරන ලදී.
ආශිකා බ්‍රාහ්මණ
