දීප්ති රොමේෂ්ගෙන් අඛණ්ඩ ජයග්‍රාහී පිරිනැමීමක්

සටහන – නිශ්මං රණසිංහ

මැයි 13, කොළඹ (LNW): මධ්‍යම ආසියානු වොල්බෝල් සූරතාවලිය යටතේ ශ්‍රී ලංකාව සහ ඇෆ්ගනිස්තානය අතර පැවති තරගයෙන් ශ්‍රී ලංකාව වට 3-0 ක් පහසු ජයක් ලබා ගන්නට සමත් වුණා.පළමු වටය ලකුණු 25 – 19 ක් ලෙස ජය ගන්නට ශ්‍රී ලංකාව සමත් වුණත් දෙවන වටයේදී ඇෆ්ගන් කණ්ඩායම ලකුණු 19 ලබා ගනිද්දිත් ශ්‍රී ලංකාව සිටියේ 16 වන ලකුණේයි.එහෙත් එතැන් පටන් නායක දීප්ති රොමේෂ් සිය පන්දු පිරිනැමීමෙන් ඇෆ්ගන් කණ්ඩායම ලකුණු 19 සිටියදීම,ශ්‍රී ලංකා ලකුණු පූවරුව ලකුණු 23 දක්වා ගෙන එමින් ලකුණු 7 ක් එක දිගට ලබා ගැනීමට කටයුතු කළා.එහිදී දීප්තිගේ පිරිනැමීම ඉහළ මට්ටමක තිබීම මෙන්ම ශ්‍රී ලංකා කණ්ඩායම කණ්ඩායමක් හැටියට දැක් වූ දායකත්වය ද නිසා එම වටයේ අවසාන ලකුණු සටහන 25 – 20 ක් ලෙස ශ්‍රී ලංකාවට ජය හිමිවෙමින් නිමා වුණා.

පකිස්තානය සමඟ පැවති තරගයේදී ශ්‍රී ලංකාව ඉදිරියෙන් සිටි දෙවන වටය පකිස්තානය ජය ගැනීමෙන් නිමා කළ පසුව තෙවන වටයේදී වඩාත් විශ්වාසයෙන් ප්‍රතිවාදීන් කෙරෙහි පීඩනය යොමු කළ පකිස්තානය මෙන්ම මෙම තරගයේදීත් ශ්‍රී ලංකාව තෙවන වටයේදී වඩාත් බලසම්පන්න ක්‍රීඩා රටාවක් අනුගමණය කළා.එහි ප්‍රතිපලයක් වශයෙන් ශ්‍රී ලංකාවට තෙවන වටයේ ජය හිමි වුණේ ලකුණු 25 – 14 ක් ලෙසයි.