කැබිනට් සංශෝධනයක් ගැන පසුගිය සති කිහිපයක් තිස්සේ විවිධ කතා කියවෙමින් තිබුණා. සුනිල් හඳුන්නෙත්ති සහ කේ. ඩී. ලාල්කාන්ත වැනි ඇමතිවරුන් මේක බොරුවක්ය කියලා කිව්වාට සභානායක බිමල් රත්නායක කියලා තිබුණේ කැබිනට් සංශෝධනයක් සිදුකරන බලාපොරොත්තුවක් ආණ්ඩුවට තියෙනවාය කියලායි.
කොහොමවුණත් මේ වෙද්දී ආරංචිමාර්ග සඳහන් කරන ආකාරයට නම් කැබිනට් මණ්ඩලයේ සාමාජිකයින් සංඛ්යාව 23 සිට 25 දක්වා වැඩිකරමින් කැබිනට් සංශෝධනයක් ඉදිරි සති කිහිපය තුළ සිදුකිරීමට නියමිතයි ලු.
මෙතැනදී මුස්ලිම් ජාතිකයෙකුට ඇමති ධුරයක් හිමිවෙන්න නියමිතයි ලු. ඒ, දැනට පවතින කැබිනට් මණ්ඩලයේ මුස්ලිම් අමාත්යවරයෙක් නොමැති නිසා. නියෝජ්ය කථානායක රිස්වි සාලි හෝ ගම්පහ දිස්ත්රික් පාර්ලිමේන්තු මන්ත්රී මුනීර් මුලාෆර්ට ඒ අවස්ථාව ලැබෙනු ඇති බවත් කියැවෙනවා.
තවත් අලුත් සාමාජිකයෙක් කැබිනට් මණ්ඩලය ඇතුළත් කරගන්න යෝජනා වෙලා තිබුණත් තවම ඒ ගැන අවසන් තීරණයක් නොමැති බවයි වාර්තා වෙන්නේ.
ඒ වගේම ආරක්ෂක විෂයයට අදාළ නියෝජ්ය ඇමතිවරයකුගේ සහ තවත් නියෝජ්ය ඇමතිවරයකුගේ විෂයය වෙනසක් සිදුකරන්න නියමිතයි කියලාත් ආරංචිමාර්ග සඳහන් කරනවා.
