කොළඹ LNW:පවතින අයහපත් කාළගුණ තත්ත්වය නිසා මතු වන හදිසි ආපදා තත්ත්වයන් දැනුම්දීමට සහ විපතට පත් පුද්ගලයන් වෙත තවදුරටත් සහන සැලසීම වෙනුවෙන් ආපදා කළමනාකරණ මධ්යස්ථානයේ 117 හදිසි දුරකථන ඇමතුම් අංකය 24 පැය පුරා ක්රියාත්මක කර තිබෙන බව ආපදා කළමනාකරණ මධ්යස්ථානය දැනුම් දෙයි.
එමඟින් සේවා සම්බන්ධයෙන් සෘජුව දායක කරගත යුතු සියලු රාජ්ය ආයතන සහ නිලධාරීන් සම්බන්ධ කිරීමටත් අවශ්ය පහසුකම් සැලසීමටත් කටයුතු සලසා ඇත.
මේ අතර දිවයිනට බලපා ඇති හදිසි අයහපත් කාලගුණ තත්ත්වය හේතුවෙන් ඇති බව ආපදා තත්ත්වයන් පිළිබඳව දැනුම්දීම සඳහා පොලීසිය විසින් ආර්ම්භ කළ විශේෂ මෙහෙයුම් මැදිරියේ දුරකථන අංක යාවත්කාලීන කර තිබේ.
ඒ අනුව 011 2 42 18 20 යන ක්ෂණික ඇමතුම් අංකය ඔස්සේ එම විශේෂ මෙහෙයුම් මැදිරිය හා සම්බන්ධ විය හැකි බව පොලිස් මාධ්ය කොට්ඨාසය සඳහන් කළේය.
මීට අමතරව 011 2 43 92 12, 011 20 130 36 හෝ 011 20 130 39 යන දුරකථන ඔස්සේ ද එම මෙහෙයුම් මැදිරියට තොරතුරු ලබා දිය හැකිය.
පොලිස් මුලස්ථාන දිසාව භාර නියෝජ්ය පොලිස්පතිවරයාගේ අධීක්ෂණය යටතේ මෙම විශේෂ මෙහෙයුම් මැදිරිය ක්රියාත්මක වන අතර හදිසි ආපදා තත්ත්වයන් පිළිබඳව වාර්තා කිරීමට සහ අවශ්ය සම්බන්ධීකරණ කටයුතු සිදුකිරීම එමඟින් සිදුකරයි.
මේ අතර [email protected] යන විද්යුත් තැපැල් ලිපිනය ඔස්සේ ද තොරතුරු ලබා දිය හැකි බව පොලිස් මාධ්ය කොට්ඨාසය සඳහන් කරයි.
අයහපත් කාලගුණ තත්ත්වය හේතුවෙන් ආපදාවට ලක්වූවන්ට කඩිනම් සහන සැලසීම සඳහා අවශ්ය මුදල් ප්රතිපාදන අදාළ දිස්ත්රික් ලේකම්වරු වෙත වහාම නිකුත් කරන ලෙස ජනාධිපති රනිල් වික්රමසිංහ මහතා ඊයේ මුදල් අමාත්යාංශයේ ලේකම්වරයා වෙත උපදෙස් ලබා දී තිබුණු අතර ආපදා තත්ත්වය හේතුවෙන් පූර්ණ හානියට පත් සියලු නිවාස රජයේ මුදලින්, ත්රිවිධ හමුදාවේ සහ පොලීසියේ දායකත්වයෙන් ඉදිරි මාස 02 තුළ ඉදි කිරීමට පියවර ගන්නා ලෙස ද ජනාධිපතිවරයා අදාළ පාර්ශ්වයන් වෙත උපදෙස් ලබා දී තිබේ.
මේ වන විට රාජ්ය පරිපාලන අමාත්යාංශය, ආරක්ෂක අමාත්යාංශය ප්රමුඛ ත්රිවිධ හමුදාව සහ පොලීසිය සහ සිවිල් ආරක්ෂක දෙපාර්තමේන්තුව, ආපදා කළමනාකරණ මධ්යස්ථානය, දිස්ත්රික් ලේකම් කාර්යාල, බලපෑමට ලක්ව ඇති සියලු ප්රදේශීය ලේකම් කාර්යාලවල අත්යාවශ්ය නිලධාරීන් සහ ග්රාම සේවා නිලධාරීන් ප්රමුඛ ප්රාදේශීය ආපදා කළමනාකරණ නිලධාරීන් විපතට පත්වූවන්ට සියලු සහන සැලසීම සඳහා කටයුතු කරමින් පවතියි.
මේ අතර අයහපත් කාලගුණ තත්ත්වය හේතුවෙන් පස්කදු හෝ ගස් කඩා වැටීමෙන් දුම්රිය මාර්ග හා මහාමාර්ග අවහිර වී ඇත්නම් වහාම ප්රදේශීය ඉංජිනේරු කාර්යාල දැනුවත් කරන ලෙස ද මහාමාර්ග අමාත්යංශයේ ලේකම්වරයා මහජනතාවගෙන ඉල්ලා සිටියි.
ආශිකා බ්රාහ්මණ
![](https://sinhala.lankanewsweb.net/wp-content/uploads/2024/06/LNW-Newsroom-ad-at-the-bottom-Sin-9-1024x137.png)