ශ්‍රී ලංකන් ගුවන් සේවයට තවත් ගුවන් යානයක් එකතුවෙයි. නිරීක්ෂකයින්ට විශේෂ අවස්ථාවක් !

සටහන – රුවන් නෙළුගොල්ල

ශ්‍රී ලංකන් ගුවන් සේවයේ ගුවන් යානා ඇණියට එකතු වන එයාර්බස් A330-200 ( Airbus A330-200) පුළුල් බඳ (wide-body) සහිත ගුවන් යානය හෙට (ජුනි 4) ශ්‍රී ලංකාවට පැමිණීමට නියමිතව තිබේ.

ප්‍රංශයේ පැරිස් නුවර සිට පැමිණෙන මෙම ගුවන් යානය, මෙරට ගුවන් යානා නිරීක්ෂකයින්ට විශේෂ අවස්ථාවක් ලබාදෙමින්, කොළඹ සහ කටුනායක ඉහළ අහසේ අඩු උසකින් පියාසර කිරීමක් සිදු කරනු ඇති බව සඳහන්.

ඒ අනුව, උදෑසන 8:00 සිට 9:00 දක්වා, අඩි 1500ක පමණ උසකින්, මෙම ගුවන් යානය කොළඹ වෙරළ තීරය ඔස්සේ, වරාය නගරයේ හි දකුණු කෙළවරේ සිට මොරටුව දක්වා දිස්වන පරිදි පියාසර කරනු ඇත.

ඉන්පසු කටුනායක බණ්ඩාරනායක ජාත්‍යන්තර ගුවන්තොටුපළ (BIA) වෙත පැමිණෙන අතර ගොඩබැසීමට පෙර බණ්ඩාරනායක ජාත්‍යන්තර ගුවන්තොටුපළට ඉහළින් තවත් පියාසැරියක් සිදු කරනු ඇත.

ශ්‍රී ලංකාව ලොවට සම්බන්ධකරන දිගු දුර හා කෙටි දුර ගමනාන්ත මෙහෙයුම් සඳහා ශ්‍රීලංකන් ගුවන් සේවයේ යානා ඇණිය සමඟ එකතුවන මෙම ගුවන් යානය පළමු වරට පැමිණීම දැකගැනීමට ලැබීම ගුවන් යානා ලෝලීන්ට සහ නිරීක්ෂකයින්ට ආකර්ෂණීය අවස්ථාවක් වනු බවයි එම ගුවන් සේවය සඳහන් කරන්නේ.