කොළඹ LNW:රටේ පවතින සියලුම ස්ථර දේශපාලනීකරණය වී තිබෙන අතර නීතියේ ආධිපත්‍ය ද දේශපාලනයට හසුව තිබෙන බව අගරදගුරු අති උතුම් මැල්කම් කාදිනල් රංජිත් හිමිපාණන් වහන්සේ ඊයේ (11) කොළඹදී පැවති උත්සවයකදී පැවසූහ.
මේ වන විට ජනාධිපතිවරයා විසින් නීතිපති වෙත සේවා දිගුවක් ලබා දීමට අපේක්ෂාවෙන් සිටින අතර එයට කතෝලික සභාවද යොදා ගැනීමට උත්සහ කරමින් තිබෙන බවයි උන්වහන්සේ පැවසුවේ.
කතෝලික සභාව ලෙස එයට කිසිලෙසකින්වත් සහයක් නොදෙන අතර රට තුළ රෙජීමයක් බලාපොරොත්තු නොවන බවයි උන්වහන්සේ සඳහන් කළේ.
මේ වන විටත් ජනතාව ලෙස අප සිටින්නේ පරිපූර්ණ සමාජයක නොවන අතර ජනමත විචාරණයක් හරහා තවදුරටත් පාලනයේ සිටීමට පාලකයින් උත්සහ කරමින් සිටින අතර රට විනාශ කළ දේශපාලඥයින් විසින්ම ඉදිරි වසර දෙක තුනක කාලයක් වෙනුවෙන් රට පාලනය කිරීමට උත්සහ දරමින් සිටින බව උන්වහන්සේ ප්‍රකාශ කළහ.
එය අනුමත කළ නොහැකි බවයි කාදිනල් හිමියන් පැවසුවේ.
ව්‍යවස්ථාවට අනුව රටක් පාලනය කිරීම සඳහා ජනාධිපතිවරයෙක්ට වසර පහක කාලයක් දී තිබෙන අතර අනතුරුව නව ජනාධිපතිවරයෙක් පත්කරගැනීම සඳහා ජනතාවට අවස්ථාව තිබිය යුතු බවත් එම අවස්ථාව උදුරා ගැනීමට නොහැකි බවත් ඒ වෙනුවෙන් ජනතාව ලෙස අප නැගී සිටිය යුතු බවත් කාදිනල් හිමිපාණන් වහන්සේ වැඩිදුරටත් ප්‍රකාශ කළහ.
ආශිකා බ්‍රාහ්මණ
