කොළඹ LNW:2023 වසර සදහා ඉදිරිපත් කරන ලද අයවැය යෝජනාවන්ගෙන් 89% ක ප්‍රගතිය මැන ගැනීම සදහා අවශ්‍ය තොරතුරු නැති බව වෙරිටේ රිසර්ච් ආයතනය පවසයි.
රුපියල් බිලියන 49.3 ක් වූ වෙන් කරන ලද සමස්ත මුදලෙන් රුපියල් බිලියන 43.8 කට අදාල තොරතුරු නොමැති වීමේ තත්ත්වයක් පවතින බවයි ඔවුන් සඳහන් කරන්නේ.
2022 වසරේ තත්ත්වය මීටත් වඩා බිහිසුණු තැනක පැවති අතර එම වසරේ දී වෙන් කරන ලද මුදල්වලින් 93% කට අදාලව, එකී මුදල් වෙන් කර තිබූ යෝජනා වල ප්‍රගතිය පිළිබදව කිසිදු තොරතුරක් සොයා ගැනීමට නොහැකි වී තිබුණි.
තෝරාගත් දිස්ත්‍රික්ක හයක උග්‍ර මන්දපෝෂණයෙන් පෙළෙන දරුවන් 5640 දෙනෙකු හදුනාගෙන ඔවුන්ගේ පෝෂණය වෙනුවෙන් එක් දරුවෙකු සදහා රුපියල් පහළොස් දහසක මුදලක් ලබා දෙන බව 2023 අයවැයෙන් යොජනා කර තිබුණද, එම යෝජනාව ක්‍රියාත්මක වී නැති බව වෙරිටේ රිසර්ච් ආයතනය පවසයි.
සමෘද්ධිය, වැඩිහිටි දීමනාව, විවිධ ආබාධතා ඇති පුද්ගලයන්ට ලබා දෙන දීමනාව, වකුගඩු රෝගීන් සදහා ලබා දෙන බවට පොරොන්දු වූ දීමනාව ආදී 2023 අය වැය මගින් යෝජනා කර තිබූ සුබසාධන කටයුතුවලට අදාල ප්‍රගතිය පිළිබද කිසිදු තොරතුරක් සැපැයීමට රජය අපොහොසත්ව තිබෙන බවද සදහන්.
ASK
