සටහන – රුවන් නෙළුගොල්ල
කාන්තාවන් සවිබල ගැන්වීමේ පනත් කෙටුම්පත සංශෝධන සහිතව ඊයේ (20) පස්වරුවේ පාර්ලිමේන්තුවේදී සම්මත විය.
මෙම පනත් කෙටුම්පත පාර්ලිමේන්තුවට ඉදිරිපත් කර තිබුණේ පාර්ලිමේන්තු මන්ත්‍රීවරියන්ගේ සංසදය, ළමුන්, කාන්තාවන් හා ස්ත්‍රී-පුරුෂ භාවය පිළිබඳ ආංශික අධීක්ෂණ කාරක සභාව සහ කාන්තා ළමා කටයුතු හා සමාජ සවිබල ගැන්වීම අමාත්‍යාංශයේ සාමූහික ප්‍රයත්නයක ප්‍රතිඵලයක් ලෙසිනි.
පසුගිය මැයි 04 වනදා පාර්ලිමේන්තුවට ඉදිරිපත් කරන ද එම පනත් කෙටුම්පත දෙවැනිවර කියවීමේ විවාදය ජුනි 04 වනදාත් ඊයේ දිනයේදීත් සිදුකෙරුණු අතර ඊයේ පස්වරුවේ එය සංශෝධන සහිතව සම්මත කෙරිණි.
මෙම පනත් කෙටුම්පත මගින් කාන්තාවන් පිළිබඳ ජාතික කොමිෂන් සභාවක් ස්ථාපිත කිරීම සඳහා විධිවිධාන සපයා ඇති අතර කාන්තාවන්ගේ අභිවෘද්ධිය වෙනුවෙන් තවත් විධිවිධාන රැසක් ද ඊට අඩංගු වේ.
