සටහන – රුවන් නෙළුගොල්ල
ගෙවීම් පැහැරහැර ඇති බව කියන රුපියල් මිලියන 5800ක වැට් බදු මුදල වහාම ගෙවා අවසන් කරන ලෙස කොළඹ මහේස්ත්‍රාත් අධිකරණය ඩබ්ලිව්. එම්. මෙන්ඩිස් සහ සමාගමේ අධ්‍යක්ෂ අර්ජුන් ඇලෝෂියස්ට නියම කර තිබේ.
ඒ, එම නඩුව ඊයේ (26) කොළඹ අතිරේක මහේස්ත්‍රාත් ඕෂධ මිගාර මහාරච්චි මහතා ඉදිරියේ කැඳවනු ලැබූ අවස්ථාවේදී ය.
එහිදී අර්ජුන් ඇලෝෂියස් වෙනුවෙන් පෙනී සිටි නීතීඥවරයා අධිකරණ හමුවේ කරුණු දක්වමින් සඳහන් කළේ හිඟ බදු මුදලින් කොටසක් මේ වනවිටත් ගෙවා ඇති බවත් මේ වනවිට විත්තිකාර සමාගමේ දේපළ තහනමට ගෙන අදාළ දේපොළ බැංකුවලට සින්නවී ඇති බැවින් මුදල් ගෙවූ ලේඛන සොයාගැනීමට නොහැකි වී ඇති බවත් ය.
එහෙත් දේශීය ආදායම් දෙපාර්තමේන්තුව වෙනුවෙන් පෙනී සිටි නීතීඥවරයා පැවසුවේ අදාළ බදු මුදල් ගෙවා තිබේ නම් ඊට අදාළ ලේඛන ඉදිරිපත් කළ යුතු බවත් අදාළ ලේඛන සොයාගැනීමට නොහැකි බවට ප්‍රකාශ කිරීම නිදහසට කරුණක් නොවන බවත් ය. එසේම බදු ගෙවිය යුතු කාලය ඉක්මවා ගොස් ඇති නිසාත් විශාල මුදලක් නොගෙවා පැහැරහැර ඇති නිසාත් තවදුරටත් විත්තිකරුට සහනයක් ලබාදීමට නොහැකි බවත් ඔහු සඳහන් කළේය.
දෙපාර්ශ්වයේම කරුණු සලකා බැලූ මහේස්ත්‍රාත්වරයා විත්තිකාර සමාගම විසින් බදු මුදල් ගෙවිය යුතු කාලය ඉක්මවා ගොස් ඇති බැවින් වහාම එම බදු මුදල ගෙවා අවසන් කරන ලෙස නියම කළ අතර බදු මුදල් නැවතත් ප්‍රමාදයකින් තොරව ගෙවන්නේද නැද්ද යන්න පිළිබඳව ඉදිරි නඩු දිනයේදී ස්ථිර ලෙස කරුණු දක්වන ලෙසත් නියම කළේය.
නඩුව සැප්තැම්බර් 30 වනදා යළි කැඳවීමට නියමිත ය.
