සටහන – රුවන් නෙළුගොල්ල
බැඳුම්කර වංචාව සම්බන්ධයෙන් චෝදනා එල්ල වී ඇති පර්පෙචුවල් ට්‍රෙෂරීස් සමාගමේ ව්‍යාපාර කටයුතු තවදුරටත් අත්හිටුවීමට ශ්‍රී ලංකා මහ බැංකුව තීරණය කර තිබේ.
ඒ අනුව ඊයේ (ජුලි 05) පස්වරු 04.30 සිට බලපැවැත්වෙන පරිදි තවත් මාස 06ක කාලසීමාවක් සඳහා අදාළ සමාගමේ ව්‍යාපාර කටයුතු අත්හිටුවා ඇති බවයි ශ්‍රී ලංකා මහ බැංකුව නිවේදනය කර ඇත්තේ.
පර්පෙචුවල් ට්‍රෙෂරීස් සමාගමේ ප්‍රාථමික අලෙවිකරුවකු වශයෙන් සිදුකළ ව්‍යාපාර කටයුතු සහ ක්‍රියාකාරකම් අත්හිටුවීමට කටයුතු කර ඇත්තේ ලියාපදිංචි ස්කන්ධ හා සුරැකුම්පත් ආඥාපනත හා දේශීය භාණ්ඩාගාර බිල්පත් ආඥාපනත යටතේ නිකුත් කරන ලද නියෝගයන්ට අනුව, ශ්‍රී ලංකා මහ බැංකුව විසින් කරනු ලබන විමර්ශන කටයුතු තවදුරටත් සිදුකරගෙන යාමේ අරමුණින් යුතුව බවත් එම නිවේදනයේ සඳහන්.
පර්පෙචුවල් ට්‍රෙෂරීස් සමාගමේ හිමිකරු වන්නේ 2015 වසරේදී මහබැංකු බැඳුම්කර වංචාව සම්බන්ධයෙන් චෝදනා එල්ල වූ අර්ජුන් අලෝෂියස් ය.
