රෂිකා හෙන්නායක ජූලි 14, කොළඹ LNW :
රක්ෂිත බන්ධනාගාර ගත සිටි හිටපු අමාත්ය දුමින්ද දිසානායකට දැඩි කොන්දේසි මත ඇප ලබා දීමට මහේස්ත්රාත්වරයා නියෝග කර ඇත.
හිටපු අමාත්යවරයා අද (14) අධිකරණයට ඉදිරිපත් කිරීමෙන් අනතුරුව කොළඹ ප්රධාන මහාධිකරණ විනිසුරු මංජුල තිලකරත්න විසින් රු 250,000ක මුදල් ඇප සහ රු. ලක්ෂ 50 බැගින් වූ ශරීර ඇප දෙකක් මත මුදාහැරීමටයි නියෝග කර ඇත්තේ.
ශරීර ඇප ලබාදෙන පුද්ගලයින් දෙදෙනා කොළඹ ප්රදේශයේ පදිංචිකරුවන් විය යුතු බවටත් නියෝග කළ විනිසුරුවරයා, සැකකරුගේ විදේශ ගමන් බලපත්රය අධිකරණය භාරයේ තැන්පත් කරන ලෙසත්, ඒ අනුව ඔහුට විදෙස් ගමන් තහනමක් පනවන බවටත් නියෝග කළේය.
සැකකරු ඇප මත මුදාහැරීම සම්බන්ධයෙන් නීතිපතිවරයා වෙනුවෙන් පෙනී සිටි නීතිඥවරයා දැඩි විරෝධයක් දැක්වුවත් මේ සම්බන්ධයෙන් සිය නියෝගය ප්රකාශ කරමින් ප්රධාන මහාධිකරණ විනිසුරුවරයා සඳහන් කළේ, සැකකරු සන්තකයේ ගිනිඅවියක් තබාගෙන ඇතැයි මෙතෙක් අනාවරණය වී නොමැති බැවින් සැකකරුව ඇප මත මුදාහැරීමට අධිකරණය තීන්දු කරන බවයි.
හැව්ලොක් සිටි සුපිරි නිවාස සංකීර්ණයෙන් හමුවූ රන් ආලේපිත ටී 56 වර්ගයේ ගිනිඅවියේ හිමිකාරීත්වය සම්බන්ධයෙන් සිදුකරන විමර්ශනවලට අදාළව හිටපු අමාත්ය දුමින්ද දිසානායක පසුගිය මැයි මස 23 වන දා අත්අඩංගුවට ගෙන රක්ෂිත බන්ධනාගාරගත කරනු ලැබීය.
