නව ජනාධිපතිවරයකු පත්කර ගැනීම සඳහා වන ව්‍යවස්ථානුකූල ක්‍රියාදාමය ආරම්භ කිරීම සඳහා පාර්ලිමේන්තුව හෙට (16) රැස්කරන බව කථානායක මහින්ද යාපා අබේවර්ධන මහතා පවසයි.
ඒ අනුව, හෙට පාර්ලිමේන්තු රැස්වීමට සහභාගී වන ලෙස සියලුම පාර්ලිමේන්තු මන්ත්‍රීවරුන්ගෙන් ඉල්ලා සිටින බවයි ඒ මහතා සඳහන් කළේ.
ජනාධිපතිවරයකු ඉල්ලා අස්වූ විට කථානායකවරයා දින තුනක් තුළ පාර්ලිමේන්තුව කැඳවා ඒ බව දැනුම් දී නව ජනාධිපතිවරයකු පාර්ලිමේන්තුව තුළින් තෝරා පත්කර ගැනීම සඳහා නාමයෝජනා කැඳවිය යුතුය.
නාමයෝජනා භාරගැනීම දින දෙකක් තුළ සිදුකළ යුතු අතර නාමයෝජනා භාරගැනීමෙන් දින දෙකක් තුළ පාර්ලිමේන්තුවේ ඡන්ද විමසීම පැවැත්විය යුතුව ඇත.
RN
