රෂිකා හෙන්නායක ජූලි 16 කොළඹ LNW :
මාධ්‍යවේදී ප්‍රගීත් එක්නැලිගොඩ මහතා පැහැරගෙන ගොස් අතුරුදන් කිරීමේ සිද්ධියට අදාළ නඩුවේ සාක්ෂිකරුවකු ලෙස අපරාධ පරීක්ෂණ දෙපාර්තමේන්තුවේ වත්මන් අධ්‍යක්ෂ ශානි අබේසේකර මහතා නම් කර තිබෙන බව සඳහන් වේ.
නීතිපතිවරයා විසින් ඒ බව කොළඹ ත්‍රිපුද්ගල මහාධිකරණ විනිසුරු මඩුල්ලට අද දැනුම්දෙනු ලැබ ඇත.
අදාළ නඩුව කැඳවනු ලැබුවේ නාමල් බලල්ලේ, මහේෂ් වීරමන් සහ සුජීව නිශ්ශංක යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල ඉදිරියේයි.
එහිදී අගතියට පත් පාර්ශ්වය වෙනුවෙන් පෙනී සිටි ජනාධිපති නීතිඥ උපුල් කුමරප්පෙරුම මහතා අධිකරණය හමුවේ ඉල්ලීමක් කරමින් මෙම නඩුවේ ප්‍රධාන විමර්ශන නිලධාරියා මෙන්ම විමර්ශන කටයුතු අධීක්ෂණය කළ ශානි අබේසේකර මහතාව සාක්ෂිකරු වශයෙන් නම් කර නොමැති බව සඳහන් කළ බව පැවසේ.
ඔහු සඳහන් කළේ ශානි අබේසේකර මහතාව සාක්ෂිකරුවකු ලෙස නම් කරන මෙන් 2022 වසරේ නොවැම්බර් මස 29 වනදා තමන් අධිකරණය හමුවේ ඉල්ලීමක් කළ අතර එය සලකා බලන බවට එවක පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පීරිස් මහතා දැනුම්දී තිබූ බවයි.
එහෙත් මේ දක්වා ශානි අබේසේකර මහතාව අදාල නඩුවේ සාක්ෂිකරුවකු ලෙස නම් කර නොමැති බව ජනාධිපති නීතිඥවරයා පවසා ඇත.
එම අවස්ථාවේදී අපරාධ පරීක්ෂණ දෙපාර්තමේන්තුවේ නිලධාරීන්ගෙන් උපදෙස් ලබාගෙන කරුණු දැක්වූ පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් වසන්ත පෙරේරා මහතා අධිකරණයට දන්වා සිටියේ ශානි අබේසේකර මහතා මෙම නඩුවේ 109 වන සාක්ෂිකරු වශයෙන් දැනටමත් නම් කර ඇති බවයි.
ඉන් අනතුරුව අධිකරණය හමුවේ කරුණු දැක්වූ ජනාධිපති නීතිඥ උපුල් කුමාරප්පෙරුම මහතා මෙම නඩුවේ සාක්ෂිකරුවකු වශයෙන් නම්කර සිටි විශ්‍රාමික යුද හමුදා සැරයන් රන්බණ්ඩා විසින් අධිකරණයට අසත්‍ය සාක්ෂි ප්‍රකාශ කිරීම සම්බන්ධයෙන් අගතිදායක සාක්ෂිකරු ලෙස නම් කර තිබෙන බව සඳහන් කළ බව වාර්තා වේ.
ජනාධිපති නීතිඥවරයා පෙන්වා දුන්නේ විශ්‍රාමික යුද හමුදා සැරයන්වරයා විසින් අධිකරණය හමුවේ අසත්‍ය සාක්ෂි ලබාදීමට පෙර තමන්ට තර්ජන පවතින බවට නිකවැරටිය පොලීසියට පැමිල්ලක් සිදු කර තිබූ බවයි.
ඔහු අධිකරණය හමුවේ අසත්‍ය සාක්ෂි ලබා දුන්නේ එම පැමිණිල්ල සිදු කිරීමෙන් පසුව බවත් ජනාධිපති නීතිඥවරයා අධිකරණයට අවධාරණය කර ඇත.
එබැවින් ජනාධිපති නීතිඥවරයා අධිකරණයෙන් ඉල්ලා සිටියේ මෙම කාරණය පිළිබඳව විමර්ශනයක් සිදු කරන ලෙස නියෝගයක් නිකුත් කරන ලෙසයි.
එම ඉල්ලීම පිළිබඳව කරුණු සලකා බැලූ ත්‍රිපුද්ගල විනිසුරු මඩුල්ලේ සභාපති විනිසුරු නාමල් බලල්ලේ මහතා සඳහන් කළේ එවැනි නියෝගයක් නිකුත් කිරීමට අධිකරණයට හැකියාවක් නොමැති බවයි.
කෙසේ වෙතත් තමන්ට තර්ජනයක් පවතින බවට අදාළ සාක්ෂිකරු අදාල අංශවලට පැමිණිලි කළහොත් ඒ සම්බන්ධයෙන් විමර්ශනය කිරීමට සුදුසු ආයතනවලට හැකියාව තිබෙන බව විනිසුරු මඩුල්ල පෙන්වා දුන් බව සඳහන් වේ..
පැමිණිල්ල වෙනුවෙන් පෙනී සිටි නියෝජ්‍ය සොලිසිටි ජනරාල්වරයා ද පෙන්වා දුන්නේ මෙම නඩුවේ තවත් සාක්ෂිකරුවකු වන සුමතිපාල සුරේෂ් නමැත්තා තමන්ට එල්ලවී ඇති තර්ජන පිළිබඳව වින්දිතයින් හා සාක්ෂිකරුවන් ආරක්ෂා කිරීමේ අධිකාරියට පැමිණිලි කිරීමෙන් පසුව ඒ පිළිබඳව විමර්ශන ආරම්භ කර ඇති බවයි.
එම තර්ජනය කිරීමේ සිද්ධියට අදාළව මෙම නඩුවේ පළමු වන විත්තිකරු අත්අඩංගුවට ගෙන මේ වන විට ත්‍රිකුණාමලය මහේස්ත්‍රාත් අධිකරණය මගින් රක්ෂිත බන්ධනාගාරගත කර තිබෙන බවත් නියෝජ්‍ය සොලිසිටර් ජනරාල්වරයා සඳහන් කර ඇත.
කෙසේ වෙතත් නියෝජ්‍ය සොලිසිටර් ජෙනරාල්වරයා පෙන්වා දුන්නේ අදාළ සාක්ෂිකරු තමන්ට තිබෙන තර්ජනය පිළිබඳව සුදුසු ආයතනවලට පැමිණිලි කරන්නේ නම් ඊට අදාළව විමර්ශන සිදු කළ හැකි බවයි.
ඉන් අනතුරුව වැඩිදුර නඩු විභාගය මේ මස 18 වනදා දක්වා කල් තැබුණු බව පැවසේ.
එම නඩුවේ විත්තිකරුවන් ලෙස ගිරිතලේ යුද හමුදා කඳවුරේ හිටපු අණදෙන නිලධාරී ලුතිනන් කර්නල් ෂම්මි කුමාර රත්න ඇතුළු යුද හමුදා බුද්ධි අංශ සාමාජිකයන් නව දෙනෙකු නම්කර ඇත..
2010 වසරේ ජනවාරි මස මස 25 වනදා හෝ ඊට ආසන්න දිනයකදී ගිරිතලේ, හබරණ හා කොට්ටාව යන ප්‍රදේශවලදී විත්තිකරුවන් තවත් නම් නොදත් පිරිසක් සමග එක්ව රහසිගතව සිරකර තැබීමේ අරමුණෙන් මාධ්‍යවේදී ප්‍රගීත් එක්නැලිගොඩ මහතා පැහැරගෙන යාම හා ඝාතනය කිරීම යන චෝදනා සම්බන්ධයෙන් නීතිපතිවරයා විසින් දණ්ඩ නීති සංග්‍රහය යටතේ විත්තිකරුවන්ට එරෙහිව චෝදනා ගොනු කර තිබෙන බව වාර්තා වේ.
