අල්ලස් කොමිසම විසින් තමන්ව අත්අඩංගුවට ගැනීමට පෙර අපේක්ෂිත ඇපයක් මත මුදාහරින ලෙස ඉල්ලා හිටපු අමාත්ය රාජිත සේනාරත්න මහතා විසින් ඉදිරිපත් කළ අපේක්ෂිත ඇප අයදුම්පත කොළඹ මහේස්ත්රාත් අධිකරණය විසින් ප්රතික්ෂේප කර තිබේ.
මෙම අපේක්ෂිත ඇප ඉල්ලීම පිළිබඳ නඩුකරය අද (ජුලි 18) පස්වරුවේ මහේස්ත්රාත් නිල මැදිරියේදී කැඳවූ අවස්ථාවේදී පෙත්සම්කාර රාජිත සේනාරත්න මහතාගේ නීතීඥවරුන් සහ අල්ලස් කොමිසමේ නීතීඥවරුන් යන දෙපාර්ශ්වයම ඉදිරිපත් කළ කරුණු සලකා බැලීමෙන් අනතුරුව කොළඹ ප්රධාන මහේස්ත්රාත් තනූජා ලක්මාලි මහත්මිය සිය තීන්දුව ප්රකාශයට පත්කරමින් මේ බව සඳහන් කළාය.
2012 වසරේදී ධීවර අමාත්යවරයා ලෙස කටයුතු කරමින් සිටියදී නීතිමය ක්රියා පටිපාටියට පටහැනි ලෙස කිරින්ද ධීවර වරායේ වැලි කැණීම් ව්යාපෘතියක් කොරියානු සමාගමකට පැවරීම තුළින් රජයට රුපියල් ලක්ෂ 262 කට අධික පාඩුවක් සිදුකිරීමේ සිද්ධියක් සම්බන්ධයෙන් රාජිත සේනාරත්න මහතාට චෝදනා එල්ල වී ඇති අතර අල්ලස් කොමිසම විසින් මේ සම්බන්ධයෙන් සිදුකරන විමර්ශනයක සැකකරුවකු වශයෙන් ද රාජිත සේනාරත්න මහතාව නම්කර ඇත.
මේ විමර්ශනයට අදාළව ප්රකාශයක් සටහන් කරගැනීම සඳහා පැමිණෙන ලෙස අවස්ථා කිහිපයකදීම දැනුම් දුන්න ද විවිධ හේතු දක්වමින් එය මගහැර සිටි රාජිත සේනාරත්න මහතා සිය දුරකථනය ද විසන්ධි කර නිවස ද අත්හැර ගොස් ඇති බව අල්ලස් කොමිසම පසුගියදා අධිකරණයට දැනුම් දී තිබිණි.
